الحُبُ كالسلطانْ .. والقلبُ يشهدْ
في حُكمهِ الإنسانْ .. حرٌ مقيدْ
فيهِ الفناءْ .. فيهِ الشفاءْ
والقلبُ يشهدْ
...........
اذا سيطر على گلبك عشگ كل لحظة يتجدد
تموت انته وتضل عايش جسد بين البشر تنعد
واذا تعشگ حُسين انته وروحك للسمه تصعد
تشوف الدنيه مگضيه فقط حبه الذي يخلد
تمضي بهِ الاعوامْ .. والحبُ واحدْ
من في حسينٍ هامْ .. والقلبُ ساجدْ
هذا الدعاءْ .. فيه الشفاءْ
والقلبُ يشهدْ
..................
ادور بالبشر وارجع مثل حبه فلا الگه
احس دونه العمر ماله طعم والريه مختنگه
واذا مات المحب لمن يشوف حسينه من حگه
حرت مدري اموتن لو اعيش بساعة الملگه
الموتُ لي قد راقْ .. إن فيهِ أُقتلْ
والموتُ للعُشاقْ .. خيراً وأفضلْ
سيلُ الدماءْ .. فيهِ الشفاءْ
والقلبُ يشهدْ
...............
عشت بعيونك وعطفك عشت لايذ انه بسدك
فلا تفطمني من عشگك ولا تحرمني من عندك
اذا تتركني فد لحظة اتيهن اي وحگ جدك
يمن بيده مسك ايدي حشاك تضيعه العبدك
ما حالُ مَن قد تاهْ .. عنكَ وأبعدْ
قد ذاقَ طعمَ الآهْ .. في البعدِ يُجلَدْ
والإنتِماءْ .. فيهِ الشفاءْ
والقلبُ يشهدْ
................
يمر بيه الوكت يحسين واحس شوگي الك يكبر
يذكرون اسمك گبالي يضل جمر الگلب يسعر
اريد اخفي العشگ مره واضل بحبك اتستر
احبك واليحب واضح يبين حبه بالمظهر
أُخفيْ دموعَ العينْ .. والحبُ يَظهرْ
والصمتُ كالسكينْ .. في القلبَ يَنحرْ
صوتْ البكاءْ .. فيهِ الشفاءْ
والقلبُ يشهدْ
................
الك يحسين احس عمري رضاك انته فقط همي
يمن يسري بشراييني طهر بمحبتك دمي
ولا انسه ذكر اسمك فده الاسمك يريت اسمي
حلم عندي يبو اليمه اشوفك لو متت يمي
في الموتِ إن القاكْ .. أُحيى وأُخلدْ
والعيشُ في ذكراكْ .. يحلو ويُسعدْ
فيكَ البقاءْ .. فيهِ الشفاءْ
والقلبُ يشهدْ
................
اذا جان البشر يحلم يطب للجنه باخرها
انه يمك ردت يحسين وشوفت وجهك انطرها
ابيع الجنه والبيها اذا مو انته حاضرها
اشوفك جنتي وحلمي اريدك انته يا سرها
شوقاً الى رؤياكْ .. أسعى وأعملْ
مِن جنتيْ عيناكْ .. واللهِ أجملْ
هذا الولاءْ .. فيهِ الشفاءْ
والقلبُ يشهدُ
الشاعر ابو قاسم الملا
رد مع اقتباس
