انه وحبيبي بالدمع .. يوميه نتلاگه
احچيله وي لطم الضلع .. ضيعني بفراگه
وحدي اضل خلوني .. اني بعزائه جنوني
ضيعني بفراگه
...................
اسألنك اذا عندك حبيب وفتره فارگته
تضل ضايع ودمع عينك يضل يهمل اذا ذكرته
وانه حبي انذبح ضامي تفطرت بالعطش شفته
شيصبرني وانه الفاگد وحبيبي منذبح شفته

طايح حبيبي عالترب .. وصلولي اخباره
ما يرضه يصبر هل گلب .. ما تنطفي ناره
جازع ولا تصبروني .. اني بعزائه جنوني
ضيعني بفراگه
...................
اذا باقي فهم عندك واذا عندك گلب بعده
اسولفلك على حبي واخبرك انه من جنده
انه موتي عرس عندي لان رايح انه لعنده
تخوفني وانه خايف اخافن ما حصل وده

اني وحسيني خل اضل .. روح انته وبليسك
لا ما اريد اسمع جدل .. تعبني دليسك
انصحكم اتركوني .. اني بعزائه جنوني
ضيعني بفراگه
.....................
انه بعيني ظهر عشگي وحچه دمعي بجفن عيني
يضل گلبي بألم لو ما ادگه بچفي لحسيني
ابد مو تهلكه المأتم انه موتي بفگد ديني
اموتن كل سنه بعمري ويجي عاشوره يحيني

روحي وحياتي بس اله .. ناذرها لعتابه
عندي بمحرم فد صله .. بيدي ادگ بابه
ناذره ذني عيوني .. اني بعزائه جنوني
ضيعني بفراگه
........................
اذا افدي العمر كله واقدم الروح اله فدوه
خجل عندي يضل منه منو اني وشنو اسوه
عظيم وما اله ثاني الفضل يبقه اله هوه
هو الباقي وانه الفاني احمده چه اله اهوه

باقي ويضل كل الدهر .. مثل الشمس نوره
والي شبح ليك النظر .. هو انته دستوره
لا عنه لتبعدوني .. اني بعزائه جنوني
ضيعني بفراگه
.......................
ادگ راسي اذا اسمع وگع فوك الارض جسمه
فلا نگدر نوصفها غربتك يا ابو اليمه
توسد بالترب خده وشيبه مخضب بدمه
اجت روح الگمر عباس اويلي تمددت يمه

لو رضت الخيل الصدر .. تسحگ على اطفاله
ما يسوه من بعده العمر .. لو تنسبي عياله
لا تلطم تنصحوني .. اني بعزائه جنوني
ضيعني بفراگه
..................
على عيوني انرسم طفه وعلى صدري انطبع حافر
واضل اشتم حرگ خيمه اذا مرني عصر عاشر
احس بيدي حبل مشدود واحير بليلتي لباچر
واحس بالغربه وتحسر واضل بامر السبي حاير

باقي بعيوني فد طفل .. ضل يابس لسانه
ونظر بجيده نبل .. صايرله عنوانه
وي ذبحته ذبحوني .. اني بعزائه جنوني
ضيعني بفراگه


الشاعر ابو قاسم الملا