#الامومة
التعب ميخلي الام تحس باي متعه في تربية اطفالها او مراقبة نموهم
هذا طبعا صحيح 100%
بس هل هو خيار ام اجبار؟
حتى نكون منصفين
اكو أسر تمر بظروف جدا صعبه وبالتالي يصير اجبار ومابيد الام شي ابدا
فقط الدعاء وان تمر الأزمات بسرعة وباقل الخسائر
اما في حالات اخرى، صدق او لا تصدق
هو خيار!!
يعني الام فوق مسؤليتها تحب تزودهن وتزودهن وتزودهن وتهلك نفسها بشكل مبالغ بي جدا !
واذا قللت من هذا النوع من الهلاك , تحس بعدم الراحه وانه اكو شي ناقص!
وتتوهم بشكل او باخر بانها هيج حتحصل جائزه الام المثالية !
او وسام الام المتهالكه!
هاي الفكره قد تكون توارثت من جيل لجيل نتيجه الظروف القاسية الي مروا بيها اهاليتنا
بس خل ناخذ وقفه ونشوف
هل الام حاليا مجبورة تقوم بنفس الدور الي سووه اهلنا سابقا؟ ام هي دتختار هالشي؟
مثل ما ذكرت قبل قليل ، فعليا اكو هي تختار
يعني ابدا مو ضروري البيت 24 ساعه يلمع والام واكفه حارس حتى حتى لحد يبقع الكاع!
وكلش حلو ويختصر هواي اذا جمعت فلوس شوي شوي بدل ما تنصرف على اشياء مو بحاجتها ، وتشتري مثلا جهاز ذكي يشيل عنها جزء من غسل المواعين مثلا
وعادي كلش انه تعتذر من طلعه هي تحس معاجبها تطلعها وتاخذ بدالها قيلوله وي اطفالها
والافضل طبعا تتفق وي زوجها من بدايه الزواج ان الزواج تعاون وتحجيله وقت تعبها يشيل عنها
وحتى لو مضى دهر على زواجهم ما اتوقع اكو زوجه ما تعرف مفاتيح زوجها وتتعاون وياه ان يلكون حلول تخفف عنها التعب
ياريت منبقى نشجع على هاي الصوره النمطيه (الام المتهالكه)
ودائما نحاول نلكى فرصه ولو ثواني حتى نستمتع بيومنا
لان العمر يمشى وحرامات ماتبقى بالذاكره لحضات حلوه نسترجعها وقت يغيبون عنا الاطفال ويفرغ علينا البيت
منقول عن...
د.اسماء اسماعيل البدري
رد مع اقتباس
المشاركة الأصلية كتبت بواسطة ألـــيــــنــآ
