خليك بمكاني وعيشلك يوميــــن
... ومثلك كون اصير وجرب العشرة
وشوف شلون تخلص عيشة المطلوب
دم واهل المضايف منه تتبرة
اقوه امن الخمر تأثيرك اعلى الروح
انعد عالسكارة وماضكت كطرة
انه وي شوفتك داس اعله جفني الليل
وموبجدامة داسة بحافر المهرة
يالتنعس كَبل مايطلع الخفاش
انه بلياك كاسر خاطر الكَمرة
بس بالحلوة اشوفك ..بالفهاوة تروح
واني مرافكَك عالحلوة والمرة
انه امن ابجي انشف هدومي مو لخدود!
انكَع حالي حال الطالع بمطرة
وثمرك وينه خاطر بالحصاد اتخاف؟
نفع مابيك واني انحاز للشجرة
ما اكَطع التنبت بية لو صبير !
فلاح واحب السالفة الخضرة
الطبر بيدي وكلون خاف عش فوكَاك
لو عاشكَ اتعنه وبيك خط ذكرى
اعله كَد عقلك انطيتك من ردتها حساب
بجف طفلة حسبت ايامك المرة
وكَلت عد السنة ووفيلك وعديت
وخنتني انت كبل ما اوصل العشرة!
ابالك موش واحد ناس يتمشووون
مو بس اسمي صاير وجهي متذكرة
وجي سنك ذهب تضحك جنت وياي
لان تدري بلمعته تضوج الفقرة
وياملكَة التهون فشلة المطرود؟
الطلع من الكَلب نفس الطلع برة
اليشرب ماي بير بطعمة يلكَة اسرار
وشكظ منك لكَوك العطشوا بصحرة
مجتف للخبز بعدين للعباس !
الوزعته بثوابة وجيتني بعذرة
الخريف اعله الزرع بس يمي مر عالناس
شكد جاملت ناس وجوهم صفرررة
وانت ولا كَلت من دوني وحده يعيش
انه بمحجر عشت وتخيلك بسهرة
الشمس شدت رتب لجتافي من تانيت!
بمكاني وعدت امن اليمنة عاليسرة
تمنيتك تجي لو شخص ثاني وياك
وبيدك كَايدة هم موقف اعتبرة
النسيم العاصفة مو فرق عالغركَان
نفس رايد يعيشة حتى لو حسرة
والمات شماتثوب الروحة ميساويك
ويه المعتنيلة وباجي يم كَبرة
يابوية التحبة شينكره مكَفاه
تحس راح امندينك من يفرر خصرة
بعيون اليحب الظهر يقره وداع
وانه طولك عمر ماشفت بس ظهرة
منا وانتهت..مدري انتهت منــــاك
من صديت شوكَي بعينك الحمرة
رد مع اقتباس
