يحسين والله ابحبك آنه مقصّر
كلما شكرتك واجب ارجع اشكر
بكل غالي عندك مابخلت اعلينه
ماوفي الك لو مو ضلع ليك اكسر
ينادي بسمك ... كلشي بيّه
موتتني ... الغاضريه
بلا طفوفك ... بلا عزائك
يعني ابقى .. ابلا هويه
ـــــــــــــــــ
حبك مدينه وبيها ناسك احنه
يحسين يلذبحك صبح ذابحنه
والجاذبيه بهل عزه امحيرتنه
تجذبنه الك لو غفله عنك رحنه
شما اسولف ... ويّه روحي
الخيمه اصدها ... بكل جروحي
كلشي اخذه ...ومااريده
بس عليكم ... يبقى نوحي
ــــــــــــــــ
كل يوم مر وما قريت امصيبه
ولا دمعتي صبّت لذيج الشيبه
خسران احس روحي علذيج ايامي
ابقى بندامه وعايش آنه ابريبه
كل ثواني ... الضيّعتها
والتعازي ... المحضرتها
خوفي امك ... اعليّه تزعل
الوصيّه .. جن خنتها
ـــــــــــــــــ
يل شايل ابكّد العرش حنيّه
ما اسألك وانت اتعرفني اشبيّه
بس عيني تدمع وانظر الشباجك
صوتك يكَلّي حاجتك مكَضيّه
آنه مذنب ... وانت تغفر
عيوبي كثره ... وانت تستر
بهل خطايه ... عذّبيتك
وبالندامه .. حكَي اشعر
ـــــــــــــــ
يحسين يامولانه يابو الشيمه
افتح دليلي وتلكَه ناصب خيمه
من نار حزنك جنها دكَاتي اتفر
كل دكَّه جنها بهل دليل ايتمه
بكل صباحي ... وكل مسيه
صوتي يندب ... يارقيه
زغيره تبجي ... من ألمها
تصيح عمّه .. زركَه اديّه
ـــــــــــــ
أبوعلي النجفي
رد مع اقتباس
