هنا

[د. حسن سعيد]

أكو فد كردي راد يشتري دوش ...
دليمي قدمو له بقلاوة ...
واحد من المنصور جابو له كتاب مال دين ...
شروگي راح لبغداد ...

بزر نستلة ، محافظات

الله يساعدهم . الادارة لتحذفون الموضوع ، الأعضاء لتنفعلون . وداعتكم هدفي النقاش وكل احترامي للفئات اللي ذكرتهم بالأعلى.
سؤالي : منين تطلع النكات على هالفئات وغيرها ؟ ومنين تجي هالمصطلحات - بزر نستلة - وأمثالها؟ منو اللي يطلعهن وشلون چانت تنتشر بالوكت اللي ماكو انترنت ولا مواقع تواصل تنشرهن؟ الغرض معروف اثارة النزعات العنصرية ، بس شلون نحارب هيچ شغلات وعلى الأقل نحد منها بأكبر قدر ممكن - اذا منگدر نقضي عليهن- ؟

أنتظر ردودكم بس رحمة لوالديكم بلا تشنج. تحية حب واحترام لكل انسان شريف عامةً وكل عراقي وطني مخلص خاصةً.

[♕ملك روحي♕]

تحية طيبة الك عزيزي الورد من وجه نظري الخاصة
هذا المصطلحات القديمة اكو فد كردي او فد يوم دليمي ... الخ .. كان يستخدمها حزب البعث المقبور والبعثية والمخابرات ..
للتقليل من شأن الاكراد والغريبة ... او من الشروكية من الجنوب ..
اما بزر نستلة في المسرحيات العراقية ومسلسلات كوميدية القديمة وتعرف قناة قناتين ف السالفة تنتشر بسرعه ...

[Suzana]

بالموقع نحارب هيج شغلات بمنع نشرها ،بالواقع اللي يتكلم بهذه المصطلحات شروكي ومعيدي ومحافظات وماادري شنو فحتما يوجد خلل عنده بحياته جاي يغطي عليه من خلال الهجوم اللفظي واحتقار الاخر والتعامل معه بتمييز وعنصرية وهذه تعتبر من اسوء السلوكيات والامراض في المجتمع..
واكو سلوكيات اخرى مرات اشوفها من خلال متابعتي للردود شخص يناقش وفقا لفهمه البسيط للقضية ويجي الاخر مايناقش الموضوع وانما دوره محدد بتقليل شان صاحب التعليق حصرا وكانما هو علامة او فطحل زمانه ..

ع العموم محاربة هذه القضايا عبر نشر ثقافة الاختلاف وقبول الاخر وعدم تهميشه والتعامل بصورة انسانية وللاسف هالشي صعب على الجهلة..
شكرا حسن

[محمد علي نعناع]

انها عقد ياصديقي عقد الاخلاق التي تسبب نقص عند هذا او ذاك ومن يتبعهم من القطيع لتقليل شان ابناء سومر واور واكد وحرمانهم من ابسط حقوقهم في الكرامة والمكانة لمنافع خاصة دنيوية بهم فينعت هذا بدليمي وكوردي مستهزأ من قوميته او عشيرته وحتى مذهبه لو كان هناك تطبيق صحيح لتعاليم الاسلام التي تحث على الانسانية لما وصل بنا الحال الى التمايز بل الجميع لهم نفس الحقوق .
خير مثال على التمييز الطبقي والاستنزاف الشهري المستمر على حساب الاخر قانون رفحاء من اقره لايعرف معنى الانسانية.

[نغم الجبوري]

[أبن ألأشتر]

انها عقد ياصديقي عقد الاخلاق التي تسبب نقص عند هذا او ذاك ومن يتبعهم من القطيع لتقليل شان ابناء سومر واور واكد وحرمانهم من ابسط حقوقهم في الكرامة والمكانة لمنافع خاصة دنيوية بهم فينعت هذا بدليمي وكوردي مستهزأ من قوميته او عشيرته وحتى مذهبه لو كان هناك تطبيق صحيح لتعاليم الاسلام التي تحث على الانسانية لما وصل بنا الحال الى التمايز بل الجميع لهم نفس الحقوق .
خير مثال على التمييز الطبقي والاستنزاف الشهري المستمر على حساب الاخر قانون رفحاء من اقره لايعرف معنى الانسانية.

اتفضل
هسة اذا الاخ محمد نعناع من فئة معينه
اعتقد الك حق تقول عليه
اكو (من هذة الفئة) ولاخلل بنفسيتك
يمدح بأهل اور وسومر
وفي نفس اللحظة طعنهم .
هههههههه
ترك البعثية لان له علاقه بهم بطريقة .
ونزل على رفحاء الذكرى العظمى بالعراق
على ظهور ابناء الجنوب .على اعتى ظالم يخاف منه
كل العرب .
هاي السوالف تجبرك
تكول اكو ..........مدري ياهو .

[د. حسن سعيد]

كتبت الموضوع وطلعت گلت ( الله يستر بس لا تصير عركة بين كم واحد وينغلق ) هم زين بس بعد قللو حدة البسامير، آسف هسة گاعد أشرب عصير بالكوفيه ان شاء الله أرجع وأرد ، استمرو بردودكم وفد متطوع يخابر ست لارا محتاجين تكتب شي هنا

[أبن ألأشتر]

انا اعتقد من رضوخ الشعب الى قائد ارعن فاسد وتشجيعة بشكل مميز
اومن وجود عشيرة عريقة بمناقبها مشرفة .
ولكن يقودها ارعن . عن طريق الوراثة والعشيرة تعرفه وتمدحة بالاهازيج وغيرها من المدح .
مثال .
تعرف اكبر مناضل ومجاهد (البرزاني ) رحمه الله
وهل تعرف اكبر واحد ظلم البرزاني وظلم الكرد صدام وحزبه .
يعني مستحيل يجي واحد ظالم للكرد مثل صدام وحزب البعث .
والان لودققت .
تجد مسعود يمدحه ويترحم عليه .
فالمقصود من اكو كردي .(تلتصق بهم من خلال هذا الشيء المتناقض والمسكوت عليه)
...........
نفس الشيء نحن العرب .
ايضا يقول الكرد عنا في حالات كثيرة
أكو عربي .
ليش .
لان اكثر حكامنا عكس مطالبنا ونصفق لهم ونمدحهم
وخاصتا اللعين صدام فاليوتوب يشهد .
حتى الانبياء ماحصلو .على عدد مثله .
وفي نفس الوقت يرون الكثير منا نحن العرب
لما نرى الفياض في غير محله نقول ياريت على صدام
اونرى العاني
ينتقم من العراق في ندواته الخارجية نقول ياريت على صدام
طبعا
الكرد حقهم يقولو اكو عربي .؟
فما اعتقد تجي من تصرفات الشخص بالعشيرة او بالشعب
لان شيخ العشيرة يخرشهم وبعدين يثولهم
وكذلك الرئيس يخوف شعبه وبعدين الشعب كله ينثول
فيظل الفرد يخربط ويشوف البعيد قريب والعكس .
ويضطر الواحد يقول .
اكو عربي .لواكو كردي .
.............
مثال اخر
تعرف ان اطيب ناس بالحقيقة هم الاكراد عاشرهم تستغرب من طيبتهم وذكائهم .
لكن تتعجب لما ترى .
زعمائنا اثنينهم اكراد (برهم والكاظمي) شوفهم اشلون علاقتهم جدا طيبة بالبعثية والارهابيين .
ليش يعني ماكو كردي بالشمال افضل من ذول الاثنين القشمر .
فاعتقد من خلال هذة الصورة
تسمع هذا الكلام .
يعني
تألّف هذا المصطلح من خلال زعمائنا كرد اوعرب او عشيرة .
تحياتي لك يامبدع

[انسان ثاني]

تعال نناقش شغلة شغلة
قضية النكات ع الاكراد ، كانت بسبب الصراع السياسي بين ملا مصطفى البرزاني و الحكومة المركزية و هل قضية بلشت من عهد عبد الكريم قاسم ، و قضية الحرب بالتسقيط و التسفيه الي تتلخص بالنكتة هي حرب مستخدمة في كل البلدان تروح لمصر تلگه نكاتهم ع صعيد تروح لغير بلد هم تشوف هل شيء

اما قضية الدليم بسبب مواقفهم من حكومة صدام الي كانت نوعاً ما غير متوافقة مع سياسة الدولة لذلك عمد النظام للتقليل منهم

الشروگ ، هي تسمية تاريخية لسكان جنوب شرق الفرات مثل بابل و واسط و البصرة و ميسان و المثنى و القادسية ، اصل التسمية مابيها مشكلة ، نسبهم الى منو يمتد؟ ينسبون هذه الشعوب و تحديداً سكان الاهوار الى الشعوب الاصلية الي يمتد نسبها لسومر و هذا مثبت من خلال التحاليل و الملامح و التصرفات ، اهم هذه التصرفات الي هي من طباع السومرين هي العصبية الزائدة و قضية الثأر (عادة الثار تعود لسومر و العرب تعلموها منهم)

هنا وين تتلخص المشكلة ! انه دائما يتم مهاجمة هذولة السكان بالهمجية و عدم تغليب العقل و الحكمة و اللجوء للعنف المفرط

و هذا كلام عنصري غير مقبول ، اكو من يخلط بين الشروگي و المعيدي وهم هذا خلط مغلوط ، الشروگي عرفناه منو ، اما المعيدي ما مقصود بيها سكان معينين و انما اي شخص جاهل يعادي التطور و يحاربه لان يخاف من التحديث

و لازم ننوه الى ان التقليل من شأن المعدان هو مو عنصرية ولكن ان تسمح للمتخلف ان يتصدر المشهد و يأثر ع المثقف هنا قمة العنصرية.........

[الرميثي]

كان المرحوم جلال الطلباني هو بنفسه ينكت على الاكراد
حتى اتذكر فد يوم في مقابلة على قناة الحرة عراق
القى بيت شعري على نفسه عندما طلبوا منه نكتة فقال :
لاكهربا لا ماي لا نفطي عندي
فوكَ الهضم والظيم ريسنا كردي