يابة : سلام عليكم، خلي نسولف بالشعبي الفصيح.
شنو سالفة معظم كبار السن من العراقيين؟ كل ما يشوفون الشباب يكسرون بيهم ويكولون لهم (انتو ششايفين؟ احنة عشنا الصعوبات واشتغلنا شغل الزلم الخشنة مو مثلكم هسة مايعين ما بيكم حظ) ، هذا الشي لاحظته عند نسبة عالية من كبار السن -نساء ورجال- ، تخيل تجي الأم ترزل بنتها (انتي هم حاسبة نفسج شاطرة؟ بكدج جنت أمسح البيت كله بساعة وبيوم واحد أطبخ وأغسل هدوم بيدي و... وما جان عندي غسالة ام الكهرباء ولا فرن مثلج ، وانتي عندج كل هذني بس خايبة وبومة) -مع الاعتذار للسيد القارئ- ، يجي الرجل يلزم ابنه ( وينك وين جروخك ؟ بكدك جنت أطلع من 5 الصبح أشتغل لل 10 بالليل ، جنت عسكري الضابط دائماً يكرمني لأن ما أخالف ولا أتعاجز، انت هم حاسب نفسك رجال يالخايب ؟ ) .
ليش الجماعة مسوين نفسهم مازنجر وكريندايزر و... ومطلعينا مخلوقات ورقية -بزر نستلة على كولتهم- ؟ مدري يريدون نعيش صعوباتهم لو شيريدون بالضبط؟ زين احنة شنو ذنبنا اذا انولدنا شفنة الموبايل والكومبيوتر وهُمة ما شافوهن؟
فد كم خوش ولد على خوش بنية يجاوبوني حتى أفتهم ، وأشوفكم بمصيبة أأأ بموضوع ثاني.
في أمان الله -bye bye- على كولة بزر النساتل
رد مع اقتباس
المشاركة الأصلية كتبت بواسطة الرجل الحر ♪
لأنهُ الزمن الذي كانوا فيه ، يختلف عن هذا الزمان .. وانا اعتقد الآنسان الواعي ، سواءً الأب او الأم لايصدُر منهم هكذا كلام ضد ابنائهم ..
