هزن .. طعم عنبرچن وصل للدم
هزن والگلوب البيهه سندان ألوفه
اظلمن ..
(خفه بعين) النده العاشر توالي الگاع
ولصوب أمهاتك يا وطن ما حن .
(ولك ألـــــمن)
بعد ما أنرد لـذاكَ الصوب ؟
ذاكَ الصوب ريحتهم فلا تنشم ..
وأنت بعادتك (تنطاق)
عود ألما يدك بالراس
ما يحتاج نوصله .
ها .. فتح درب لاعتم ؟
مر أبذيچي الولاية دخبرك ريحة الناعورة والسمچه
ولا بالدم
تمايلنه وزهينه وطگ خضار الگاع
وأنت الــــــــهسه ما مهتم !!
أرد علكم ..
لو ألعن صفحة لحضروا طاريك
واشتم جلد صبيرك .
ولوحك وأنتشي بكل حيلي لو مريت
بالصدفة..
(هدبهن) ما حمل وجة بهار الگاع
هدبهن صارلك تنور من الطين
تعال وجيب (اليهوشل) كحل لو ساح
تعال وخضر الديرة أبرحمته
وغازل التنور والكر صه
تعال (المرضع الأول)
هو الغازل ... التفاح ؟
وصارت صورتي .. وصار الشكل .. ونعرف لون الدم
بعدنه أبمرجع التكوين مختلفين
(والوگعت ورقته) أيخاوي لوح الطين ..
عوف لعلمنك عالعب بالنار
واتماهل أوياهن (وحده وي الاخره)
واحضر ريحة أمك بالعصر خطار
ريح الأم قلم ؟ لو لعنه لو جنة ..
واردلچن ..
واردلچن حمامة ود
واسكر بالهوه اليخنگ ..
والوب .. واخذ ( الديرم ) رمز للحب
للناس للديرة للبطون البگت تنجب
خفه بعين الهموم الفات موسمهه
ها بلش.. حصاد الحب.
ابراهيم الحسن
رد مع اقتباس
