جنهه فشلة مستحه ابعثرة عروس ( كاظم علي الركابي)
روحي ديرة اتسكن الاف الهموم
وكلبي شارع داسته اجدام الجرح
انه حزني ابكثر ماعد الله كاع
والفرح شتله لجنهه ابنص ملح
عمري ليل امواعد أيام النهار
وانت اجيت وكطعت جف الصبح
أنت اجيت ابوكت بيه الحمزه طاح
او وحشي هجرك نبت ابصدري الرمح
انت اجيت ابوكت ماحل الحصاد
يلي غيمك خييب اظنون الفلح
وجنهه فشلة مستحه ابعثرة عروس
الشريجه ابصفهه واتخازر صفح
اوهاون الوحش طحن كلبي العليل
وصار كهوه ابحلك كل ياهو اليصح
حاصل اهمومي رقم كلش جبير
قسمه مايقبل ولا يقبل طرح
ابوجهي قرءان الحزن محد تلاه
والدموع آيات يحتاجن شرح
وباتت احلامي صقور اعلا الجبال
اتموت سكته امشيعه ابظهر السفح
انه جيش افراحي جيش المسلمين
وجن قريش أحزاني واندور صلح
اجروحي جوعانة لجم ماظن تطيب
تشبع ابلجمات واترد تنفتح
اوياون الحركه هبش كل الضلوع
بيد عزبه الياون اوتردح ردح
وكتي نثيه وأمنت سري ابشفاه
وابشفاه النثيه حتمآ ننفضح
او وادديت الناس كلهه او عاشريت
اوجوه صلفه اولا وجه بيهم سمح
شربتهم ماي جفني امن اشتهوه
او وكلتهم من لحم جتفي شرح
وتالي منهم ماحصل بس الجروح
( والأناء اشبيه يطلع بالنضح )
رد مع اقتباس