جف الثلج
يبو جف الثلج خد الشمس من نار
من تكرب تموع وما تمس خدهه
صفنتي ابراس بالي اندفنت امن اسنين
أشحدك من تزور او بالي مرقدهه
الصاحب ؛؛ مفرده وشالتهه ال تعريف
ومن تنشال كون التلفظ كدهه
واذا نورك طلع ؛؛ بالظلمه ماتنقاس
الشمعه ابعز ضواهه الدود طاردهه
لتغرك مظاهر والرجال اطيور
وعلى التمره البلابل صار مصيدهه
ولتغشك بشرتي ابكلبي طك جمار
اضربلك مثل والحكمه رددهه
المصحف من ورق ما نعبد الأوراق
آيات ال اله ابنصه نعبدهه
ابحبل امواصلك لا تكثر الشدات
الكمان أوتاره تخرس لو كثر شدهه
وخيمة صحبتك مرة عليهه اسنين
زلاتك مطر والماي ركدهه
ترى اشراعك ورق واشراعي من كتان
اولأن صلفه الرياح اشراعي عاندهه
وانه امماشي الربع بس ابعدد معقول
أخاف امن الرفاكه لو كثر عدهه
تغص روحي ابحسرتي ولا كلت مهموم
أدري بروحي تفكه الحسره مرودهه
كحيلة صحبتك وعره ابجدمهه الكاع
اذا شلت ال أعنان اشلون تلكدهه
ولك ظالم صرت وإحسان ماسويت
اعتنيت الجن تدوسه او تترك أحمدهه
أكص السان قلمي من يسولف بيك
لكن عندي قصه ولازم أسردهه
فزعتك كبل كتلك اجه الهادود
ورحت تركض عليه وحسبت كدهه
وشفتك يمه شفتك شوف هاي العين
و اتأشر عليه اتكله سددهه
وجزيت السوالف سجه وي الريل
الرايح واليرد السجه ينشدهه
ينشدوني وأكلهم توه مر مناه
وأنت أصلا يريل الفكره باعدهه
اعلا كيفك يل حمام اتعود من اطير
تراهه اصكور غيضي العاليه اتردهه
واذا تمرك لحك ؛؛ لاتعتب اعلا الريح
اشما يعله النخل تمراته يمردهه
كاظم الركابي
رد مع اقتباس
المشاركة الأصلية كتبت بواسطة احمد الگرعاوي ♪
