شوية اسرار من كواليس( لن اعيش في جلباب ابي )
هذا مقال للصحفي بهاء حجازي ..منقول ببعض التصرف.
زمان كان التلفزيون بيشتغل بنظام المنتج المنفذ .. يعني ايه ؟ يعني انا كبهاء اروح للتلفزيون اقولهم عايز اعمل مسلسل عن واحد اشترك في قناة اليوتيوب بتاعتي .. وهجيب البطل نور الشريف ومعاه مي عمر واخراج محمد سامي .. يقولولي ماشي.. اعمله وهناخد الساعة الدرامية بـ 80 الف .. ودا يمكن سبب من الاسباب ان زمان كانت الحلقات طويلة .. يعني ممكن تلاقى الحلقة 57 دقيقة .. وساعات بتعدي الساعة..
ياخد المنتج المنفذ الفلوس ويحاول يعمل المسلسل بفلوس اقل من اللي التلفزيون ادهاله ومن هنا يطلعله المكسب.. طيب ما ممكن انا اكروت المسلسل واعمله اي كلام.. هو دا كان بيحصل بس لازم يتعمل بصياعة .. لان فيه لجان كانت بتستلم الحلقات وبترفض اي حلقة فيها مشكلة .. نرجع لمسلسل لن أعيش في جلباب ابي.
كانت ميزانية المسلسل مليون و100 الف جنيه .. ودا كان رقم كبير .. ليه ؟؟
مسلسل بطولة نور الشريف.. قصة احسان عبد القدوس .. عندك مؤلف كبير زي مصطفى محرم .
شخصية المعلم سردينة مش موجودة في رواية احسان عبد القدوس اصلا ... ومصطفى محرم رحمه الله، كان بيشتري شقة مع مراته في اسكندرية.. فسأل البواب على صاحب العمارة فقالوله الحج سردينة اهو .. فعلق الاسم معاه عشان كدا سردينة كان بيتكلم اسكندراني وعشان كدا قال في المسلسل انه جه من اسكندرية..
ليه بقى قصوا المسلسل ومتعملش كامل .؟؟
انت لو لاحظت هتلاقلى فيه كروتة في اخر المسلسل يعني انت مشفتش عريس سنية .. مشفناش ولا مرة واحدة ولا ربع مرة شقة عبد الوهاب وعروسته فاطمة ابنة سيد كشري.. يا راجل المسلسل كله مش هتلاقى حد بيتفرج على التلفزيون اصلا.. ومش عارف ليه يعني بيت زي بيت الحاج عبد الغفور البرعي على سن وقمع يكون فيه تليفون ومفيهوش تلفزيون..
المسلسل بيتصور وفاضل 25 يوم تصوير.. الفلوس اللي طلعها التلفزيون خلصت وكانت ازمة كبيرة .. فقرروا يخفضوا الـ 25 يوم لـ 11 يوم تصوير .. مع ضغط التصوير وكمان الغاء مشاهد من المسلسل .. يعني كمان المسلسل كان ليه تتر متغني .. والمخرج احمد توفيق اسند كتابة الشعر للشاعر بهاء الدين محمد .. وكتبه فعلا:
"والله حقك.. مين اللى شالك؟ .. مين خلى عرقك.. فى البرد شالك؟..
ولا حد جابلك.. وإداك وسابلك؟؟.. ده المُر قابلك.. وإداك وسابلك أجرة مشالك.. يعمل نفسه بنفسه ومحدش يعمله. وأما الأيام تنافسه.. أحسن ما تهمله.
وبجملة التوفير كان اللي هيغني التتر هدى سلطان .. ايوة يعني ليه هدى سلطان .. عشان هتغني ببلاش.. هدى سلطان تبقى ام ناهد فريد شوقي منتجة المسلسل .. لكن التلفزيون رفض بهاء الدين محمد .. وقالوله عايز تتر تجيب الابنودي او سيد حجاب.. فالراجل اتحرج من بهاء الدين محمد وقرر ميعملش تتر اصلا.. واكتفى بموسيقى حسن ابو السعود.
ومن جملة التوفير ان كان مكتوب سمير صبري وفيفي عبده فعلا في فرح سنية و ابن الوزير بس دول اجرهم غالي جدا.. فجابوا مطرب مغمور كانت رباب حسين(مخرجة منفذة ومرات المخرج واخت مرات المؤلف).. شافته في عيد ميلاد بنت مصطفى الدمرداش..وجابوا رقاصة مغمورة تعمل دور فيفي عبده ( كان سيد كشري معجب بيها قوي)..
واستعانوا بشقة المنتج عادل حسنى في الزمالك،عشان تبقى شقة محفوظ سردينة وبهيرة .
وصوروا كل مشاهد الخارجي والفرحين فى فندق المريديان بالهرم فى يوم واحد.. وكان اكل الفندق غالي جابوا طباخ يعمل الاكل عشان يوفروا..
وطلع المسلسل في 36 حلقة ..
بالمناسبة كانوا عايزين خالد النبوي في دور عبد الوهاب .. لكن هو كان عايز يقرا المسلسل كامل قبل ما يصور.. قالوله اذا كان نور الشريف مضي بالمعالجة .. وصرفوا نظر عنه .. وجابوا محمد رياض يعمل دور هوبا حبيب أمه.
دور عبدالغفور البرعي كان المرشح الأول للمسلسل هو محمود عبدالعزيز لكنه أعتذر بعد ما قرأ السيناريو ليسند الى نور الشريف الذي كان رافضا للدور في بداية الامر لأنه كان يعتقد أن الوقت مبكر لاداء دور الأب
دور فاطمة كشري كان مرشح ليسرا لكن المخرج رفض الفكرة كون ان يسرا جميلة جداً و لا تتناسب مع شخصية فاطمة و الا كان قد احبها جميع من في الوكالة
ثم رشحت معالي زايد الا انها رفضت بسبب صغر حجم الدور، ليسند الى عبلة كامل التي لم تكن تحظى بالشهرة وقتها
اما دور المعلم سردينة فكان من نصيب حسن حسني، لكن الاختلاف في الاجر كان سبب استبدال حسني بعبدالرحمن ابو زهرة
سيد كشري كان من نصيب فتوح احمد الذي اعتذر لتأدية العمرة ليسند الى مخلص البحيري
رد مع اقتباس
