جان اكو واحد مدحدح زوجته وكحه راكبته ركوب , واذا رادت تعدله وتصفله صوتهه يوصل لذاك الصوب ..
عنده من هاي الزوجه بنيه وحده .. ومرت الايام والسنين والبنيه كبرت واستحقت زواج .. وبما انه الشرق الاوسط كله يعرف بلسان امهه محد دك بابهه وخطبهه للزواج ..
يوم من الايام ..اجه فارس ضيف عد هذا المدحدح , وشاف مرته شلون تعامله , وبنفس الوقت شاف بنته وعجبته وخطبهه من ابوهه ..
المدحدح ماصدك واحد يجي على بنته وياخذهه .. كبل وافق عالزواج ..
الفارس .. قبل مايروح , طلب من ابوهه ينطيه مطي , وديج , وبزون .. والمدحدح نطاه مطلبه ..
الفارس .. اخذ مرته وذني الحيوانات وطلع بيهن لديرته .. وبالطريق صادفهم نهر , الفارس جر سيفه وكال للمطي أعبر النهر ! وبما انه المطي مطي مافهم شيكول الفارس بقه على حطته يفر باذانه .. الفارس اجاه وضربه بالسيف وكص راسه ..
وراهه كال للديج اعبر .. ونفس تصرف المطي تصرف الديج , ونفس مصيره المطي جان مصيره .. وايضا" نفس الشي صار ويه البزون ..
الفارس .. باوع على مرته وكللهه اعبري .. مرته شالت ثوبهه وعبرت بدون ماتفتح حلكهه بحجايه وحده ..
وره سنه .. المدحدح يحجي ويه مرته .. كاللهه اكلج شو بنتنه من يوم عرسهه لحد الان مااجتنه زياره , وبس لاهاي لسانهه مثل لسانج وذبحهه رجلهه ..
مرته كالتله لعد خلي احنه نروحلهم ونشوف شنو الموضوع ..
وصل المدحدح ومرته الوكحه لبيت نسيبهم .. وبعد السلام , المدحدح انتبه على بنته واكفه على صفحه وتباوع على حلك رجلهه , وشيكللهه تروح ركض تسويه وترجع على نفس وكفتهه !!
المدحدح .. سال الفارس عن السر اللي خله بنته مطيعه بهالشكل .. والفارس سولفله قصته ويه الحيوانات اللي اخذهن من عنده الى نهاية القصه ..
هنا المدحدح كال للفارس , لعد انطيني مطي وديج وبزون , وانطيني وياهن سيف خلي اسوي مثل ماسويت واضرب مرتي ( بيد من حديد ) بطريق الرجعه .. ومن وصل المدحدح ومرته للنهر , المدحدح جر سيفه وكال للمطي اعبر !!
مرته كالتله , باوع , انت لو بيك خير جان من اول يوم ( شلت سيفك على المطي وحاسبته )مو تريد تالي وكت تصير رجال ( حازم , وقوي , وشجاع ) !!
رد مع اقتباس
المشاركة الأصلية كتبت بواسطة صفاء العامري
