محّد يعرفك مـولاي
فسّرنه مايَك بالماي
جَعَل الله في علي .. كلُّ شَيءٍ حَيّ
ـــــــــــــــــــ
بس الله ورسوله اليعرف أخبـارك
إذا بالمـاي أوصفـك أعله مگـدارك
الناس إبير ســرها وإنته أسـرارك
حيــل هــواي ما تتحمـل إبيارك

مدري شكثر بيك إعلوم !!
عابر دَرَجْـةْ المعصـوم !!
جَعَل الله في علي .. كلُّ شَيءٍ حَيّ
ـــــــــــــــــــ
ماكو بمسـتواك وگــادر يفهمـك
الله أبدع بخلقك ياعلي ورسْمك
رغم مو هينه چانت وادم اليمّك
على گد الـ عقول اتـوزّع إبعلمك

بس طه لا ما مشمول
عندك علم ما معقول
جَعَل الله في علي .. كلُّ شَيءٍ حَيّ
ـــــــــــــــــــ
علي عندك علم بس الله بي أدره
تِوزّع بي لچن كلمــن علـى قدره
بعرفانك كميل إنطيتـه بس ذره
اذا چمّـلته ذرّه الــوادم إتّكفــره

إنطيت الـ كميل بإتقان
بس راس خيط العرفان
جَعَل الله في علي .. كلُّ شَيءٍ حَيّ
ـــــــــــــــــــ
شفت سلمان يگدر يحوي چم جمله
من علم المنايه إنطيتــه گد عقله
شگد عندك علم ما لاگي إلـ يْحِمْـله
بقى ابصدرك ولا احّد گادر ايوصْله

علـم البلايا إشگـد چـان ؟
نص رُبعَه منطي السلمان
جَعَل الله في علي .. كلُّ شَيءٍ حَيّ
ـــــــــــــــــــ
علي ومو حگّـه ميثــم حطّـك إبّاله
بأحاديث العشگ ضل يحچي وي حاله
من عشگــك الـ ربــك ماخــذ أوشاله
بحيث أصحــابه گــالو ميثم إشماله ؟!

عندك عشگ هدّ الحيل
عشگ الصلاه تالي الليل
جَعَل الله في علي .. كلُّ شَيءٍ حَيّ
ـــــــــــــــــــ
الشـايب والطفـل والشــاب علمته
هواي اسرار عندك عقلــي سودنته
علي استثناء إنته ومدري ياهو إنته
إذا بالمــاي أفَسْـر المــاي حجّمته

وحسابي هم مدري شلون !
أوصف بشر حجم الكون
جَعَل الله في علي .. كلُّ شَيءٍ حَيّ
ـــــــــــــــــــ

مهدي التقي