هنا

[بلاسِمُ الأدب]

طلْعت اْو محّد ضعنها ناشْده..
او لا بمان الله اِسْمَعَتْ لا راشْده..
ـــــــــــــــــــــــــ ـــــــــــــــ
لا بمان الله اِسْمَعَتْ، لاهي اِسْمَعَتْ
چلمة امودّعه بالله امْن اِطْلَعَت
محّد الودّعها، لاهِي الودّعت
و اهيَه غير اوداعهم ما رايْده..
ـــــــــــــــــــــــــ ـــــــــــــــ
رايده اتودِّع اجسوم العالثره
او تالي تمشي اعله الهزيله اميسَّره
لچن حادي اظعونها امْجِد بالسِّره
او ما رحم گلب الغريبه الفاجده..
ـــــــــــــــــــــــــ ـــــــــــــــ
فاجده الوليان و اتماشي الغرُب
او عافت أخْوَتها اْو گلبها اعله التُرب
آ يَدرب السَّبي اْو شيْخلْص الدرُب
و الظعن چف الأجانب گايده..
ـــــــــــــــــــــــــ ـــــــــــــــ
عگب ذاك الخدُر تطلع للسبي!
او عگْب أبو فاضل تولّاها أجنبي
اشلون وگفه وگّفوْا بِنْت النِّبي
و الدواوين ابزلمهم عاجْده..
ـــــــــــــــــــــــــ ـــــــــــــــ
عاجْد الدِّيوان برْجاس اْو كُفُر
و لِحْبال ابإيدها تحفُر حفُر
يا صبر يبگه بعد لُمّ الصبُر ؟!
او بالطشت راس لحسين اتشاهْده !
ـــــــــــــــــــــــــ ـــــــــــــــ
يا علي او زينب بلا والي غِدَت
و العبيد اعْله الأسياد اتسيِّدَت
عالتراب الحُرَّه يا حيف اگعِدَت
او هنِد عالكُرسي يحيدر گاعْده..!


د.أبوعلي النجفي
بالهامٍ و اقتباس من ابيات الأستاذ عزيز الفيصلي



الشاعر الحاج أبو علي النجفي

[بهجة]

احسنت