تجري عينه ناوي حيدر للسفر
وي بنــــينه ليلــة اوداع وسهر
باجر ايحين الأجل يرتحل خير العمل
تجري عينه تجري عينه
*

الليله بأجواء الحزن يجري بدموعه الجفن
حيدر اببين الاهـــــــــل حانت وفاته
اممدَّد وجرحــه كلف من الدمه لا ما يجف
روحه ملچومة و يحس گرّب مماته
اينازع ابمُر الألــــم چنه مصيوب بسهم
يعلم بهذا الجــــــــــرح يفقد حياته
ابصفّه الایتام انتچَو دقّق اعيون البچو
بحرگه وبجمره بچو ولده وبناته

امفارگينه باچر بطــرت الفجر
امودّعينه و شدّو حیل علی الزجر
مايضل عدهم امل يرتحل خير العمل
**
هيّج اجروحه الحسن وزادت اهموم المحن
يشوفه حيدر منكسر بالهم دليله
يگله يابويه الصــبر انته اكبرهــــــم عمر
كوم نشف يالحسن دمع التسيله
لاتخليه يلتهب وجبدي نيرانه تشب
تعلم بروح الابو يبنــــــي عليله
يبني اسمع هالحچي اصبر وعوف البچي
باچر احمولك امضهدات وثجيله

شــايلينه نعشــــي انته التدفنه
حاملينه اويه الحسين اتعاونه
ادري بمصابي جلل يرتحل خير العمل
****
لن ابو حســـــين التوه بصدره چن ضاگ الهوه
من سمع بحسين حس الدنيه ظلمه
دمع الحســـــين انفجر ينحب وگلبــــــه انكسر
صاح يابويه علـــي ويالزهره يمه
علي من شافه بـــچه و غص قهر لمّن حچه
عالصدر حيدر فزع و اوليده ضمّه
ايگله لظّیته الگلب امصابي واغيابي صعب
لاچن المدمع على المظلومه ضمّه

هالحزينه ما نسـت يوم الضلع
الحنـــينه تشهگ جروح و دمع
فوگ كل ذيچ العلل يرتحل خير العمل
****

انوبه ابو الحمله التفت عاين الزينب بچت
گاعده اگبال الابو وتبچي بمحنّه
لونعت بويه الولــــي شلون همــّـي ينجلي
اتفلّش ابباب الگلــب ونّه اعله ونّه
وين شايل يا الأبــــو بالمگابر چا شـــــكو
انته وامّي الغاليه تمشـــــون عنّه
امحمل الليله صدك ترضه كلبي يحترك
وانه وحسين وحسن چا ياهو النه

عايفينه انته وامي لليتم؟
تاركينه بالنوايب ننلچم؟
یوجع اوداع الكفل يرتحل خير العمل
****
غص علي و ضل ينتحب تبگصّت الحرّه يحب
يگلهه يازينت علي، بطلي عويلچ
هذا عباس الشـــــهم يعرگ بغيرة وعزم
هو اخوچ وبالشـــدد باچر كفليچ
جيب چفـــــك مدّه لي هاي امانه بت علي
ها يزينب بس اندبيــــــله يجيلچ
والنعم من الگمـــــــر أله موقف عالنــــــهر
آخ لاچن ينمـــــــرد لأجله دليلچ
تنـــــدبينه ومايرد ليــچ الحچي
اتحشمينه عالي ونّچ بالبجي
صبري يالصبرچ جبل يرتحل خير العمل
****

أبوعلي النجفي
١٤٣١
طهران.



احمد حسين النجفي