منهاج جرح واستشهاد أمير المؤمنين علي بن أبي طالب عليه السلام
قصيدة (( جرح القرآن ))
بنفس ليلة قدر وبحكمة الرحمن
أخذ قرآن دينـــــــه الأنزل قرآن
بمصاب حامي الحمه .. أحزان گاع وسمه
---------------------------------------------------------------------------
إنطبر محكم كتابه ونزفت آياته
بمحراب الصلاه ودنت ساعاته
علي اليتّم أهل أرضه وسمواته
وعليه لبست سواد الإنس ويّا الجان
بمصاب حامي الحمه .. أحزان گاع وسمه
---------------------------------------------------------------------------
بدت سبع المثاني بجرحه تترتل
تلث تيام ظل وتمم المُنْزَل
علي الأول رجع للخالق الأول
دمّه بهالمصيبه اليكتب العنوان
بمصاب حامي الحمه .. أحزان گاع وسمه
---------------------------------------------------------------------------
حضر مشهد قراءةْ سور قرآنه
سبطين النبي وزينب الحزنانه
وعباس وبقية أهل مولانه
خشوع وظل يشابه صفنة الأكوان
بمصاب حامي الحمه .. أحزان گاع وسمه
---------------------------------------------------------------------------
يا ليلة قدر صارت حزن ودموع
مفجوعه تواسي بالدمع مفجوع
يختمها الوداع وتطفه بيهه شموع
وتتجدد مصايب عترةْ الديّان
بمصاب حامي الحمه .. أحزان گاع وسمه
---------------------------------------------------------------------------
مصايب والليالي شما يطولن سود
بعد عشرة ويرد چبد الحسن ممرود
ونفس هاي الدموع وهاي أهله تعود
عزاء وكل حبيب إمحضّر القربان
بمصاب حامي الحمه .. أحزان گاع وسمه
---------------------------------------------------------------------------
بمحرم عالرمح هالمحكم شما طال
راس حسين راس الدين بي ينشال
تره ابطف كربله حِمل الأطايب مال
من حرگ الخيم حد طبّت الديوان
بمصاب حامي الحمه .. أحزان گاع وسمه
---------------------------------------------------------------------------
إلى أن تم تمام اتلثطعش معصوم
حسب نوع الأجل مذبوح لو مسموم
يظهر قائم الأمة ابأمر قيّوم
ويثأر للكتاب الهِتْكِته العدوان
بمصاب حامي الحمه .. أحزان گاع وسمه
---------------------------------------------------------------------------
عمار هليل الواسطي
رد مع اقتباس