بسم الله الرحمن الرحيم.
آمنت بالقدر و امري لله سلّمت
ويّة اركان الهدى يا علي اتهدّمت
ابحزني و حنيني ... ابآهي و ونيني
ودّعتك و گلبي انفطر يا بوية نصّين
يا بَت دليلي ... و يا حيل حيلي
الله اكبر من رحت و اشحال الحسين
يلطم على صدرة ابحرگ، مَگدر اضافر
*باچر وراه هذا الصدر ، سوط و حوافر*
یا بالحسن مو مالت تروح و توادع
هالعائلة اتشوف الويل لمّن تسافر
ريّض يتاج المفخرة و درّ الإمامة
صرنة يتامة و ننتخي يابو اليتامة
_____ ₩₩₩₩₩₩₩₩₩₩₩₩₩₩_____
هامك الما نشف، يشبه اجروح الگلب
ابهجرك اتحاربني ليش، و تدري بيّة انغلب؟
يابوية بُعدك .... ايذوّبني بعدك ...
يا شعلة گلیبي تره زينب شَمِعتك
لاتغمّض العين ... و اتذبّ الايدين ...
لاتمولح جروحي و تلاچمهه ابدمعتك
يابوية دم راسك وحگّك شيّب الباب
و اخضاب محرابك ترا جدّدلي المصاب
بوية عليك اغياب أمّي و نار الأشواگ
خلّيك ويّانة، بعد ما نحمل اغياب
ريّض يتاج المفخرة و درّ الإمامة
صرنة يتامة و ننتخي يابو اليتامة
_____ ₩₩₩₩₩₩₩₩₩₩₩₩₩₩_____
مشتعل طولي هم ، من برودة نظرتك
يالعزيز ابچي دم ، چنهه حانت سفرتك!
ها يا سلوتي ... عاين لخوتي ...
كل واحد امكتّر دموعة ابصفحة و اينوح
يَسراج الأفراح ...لَتهَيج الإنياح ...
روح المحب تطلع اذا محبوبه ايروح
توّة المتن ذب حيلة من فرگاك توّة
چا باچر ابحبل العدو شیجرّه گوّة ؟!
من كون فدوة الغيرتك، خلّيك ، فدوة
شحّة امروّة الدنيه يالكلّك امروّة
ريّض يتاج المفخرة و درّ الإمامة
صرنة يتامة و ننتخي يابو اليتامة
د.أحمد حسين النجفي
أبوعلي النجفي
رد مع اقتباس