يا وزاره الصحه انقذونا
بدون مقدمات اخواني واخواتي
لقد اصبحت الاخطاء الشااااائعه في مستشفى الزهراء العام ظاهره يتحدث عنها الجميع ولا تكاد تمر ايام حتى يظهر هنا او هناك خطأ طبي جديد يؤدي الى مضاعفات او وفاة
والسبب الرئيسي هو(الفلوس ) اريد اكولها باللهجه العاميه من القهر اللي واجهته انا شخصيا
راح ادخل بالموضوع بدون مقدمات
اخواني اختي كانت تراجع احدى الطبيبات لمتابعه حالتها لانها احتاجت عمليه جراحيه لسوء وضع حملها وكانت (تداوم في مستشفى البتول) المهم قالت لها (تره على حسابج احسن لان العام بيه مشاكل بنسبه التخدير ووووووالخ)طبعا بعد التقصي والبحث طلع مستشفى البتول ما بيها خاص فقالت كلت احنا نرهمهما بيناتنا يعني شنو مااعرف طبعااحنا قبلنا لان خوفتنا من حالتها
المهم احست اختى بالم الوضع فذهبنا انا واياها الى الدكتوره المعنيه
قالت لااااا مااكدر عبالي يصير عدها ولاده غير يوم اما هاي الايام منكدر لان طبيب التخدير ميداوم الاربعاء والخميس والجمعه
لان طبيب التخدير من غير محافظه (استلم... والمريض يضرب راسه بالحايط لو يموت)
اي شعلينا
المهم رحنا على غير طبيبه علمود نشوف جاره وهاي طبعا الكشفيه مبلغ 10 الاف دينار
كالت منو تراجعون احنا خفنا نكول.... كالت اصلا ولا امد ايدي عليها وين لعد دكتورتها
كلتلها دكتور حالتها حيل تعبانه والسونر يشهد
قالت نعم انتو هسه ترحون للمستشفى وتشوفون جاره لان باي لحظه تنفصل المشيمه عن الطفل
انوب خوفتنا بلزايد كتلها دكتوره غير اجيناج كالت اني شعليه لعد ليش مراجعتوني قبل
المهم طلعنا اني وياها وحالتها النفسيه تعبت جدا
وصار عدها نزف هم فوق الظيم
رحنا على غير طبيبه
طبينا بالكوه لان ازدحام وطبعا انطينا للسستر الي واكفه بالباب
كالت الدكتوره هاي شنوووو
هسه ترحون للمستشفى لان حالتها متتحمل
كتلها دكتوره غير انتي تجين كالت: اصلا اني عندي امومه بس شوفو منو الدكتوره الخفر وكلولي علمود اخابرها (طبعا هاي الدكتوره اتعاطفت ويانا لان شافت اختي مرعوبه على الطفل وخايفه من وضعها الصحي هم)
رحنا للمستشفى واخذنا كل التقارير والسونرات
شفنا خير اللهم اجعله خير المريضات نايمات بالكاع ومحد بالطابق
والممرضات كاعدات
كلت للممرضه على حاله اختي كالت شسويلها لعد خل تجي الخفر وتشوف
بعد نصف ساعه من المعاناة اجت الدكتوره المقيمه وشافت المريضات
وشافت اختى هم كالت خلوها على المغذي كلتها دكتوره مو هيه حالتها خاصه والمشيمه باي لحظه تنفصل عن الطفل مو مال ابره على المغذي
كالت تعلميني بشغلي انتي
ظلي لعد على ماتجي الدكتوره الخفر
وانتظرنه اربع ساعات ياااااعالم يااااناس
واختي تتلوه من الالم وحالتها حاله والنزف اشتد
اجت الخفر وطبعا تحجي من وره خشمها خو من سمعت دازتنا دكتوره فلانه يبوو عكدت حواجبها وعبست
كتلها دكتوره هيج حاله اختى كالت اي وشتردين هسه كتلها تحتاج عمليه كالت اصلا اني راح اعوفها على المغذي الى ان تتعب وعود بعدين افكر اسويلها عمليه لو لا
واذا تردون تستعجلون خو على الخاص (طبعا تحاجيني بلا مبالاة)
اني اضطريت كتلها عمي ميخالف على حسابنا بس خل اختي ترتاح لان ماتت
كالت اوكي روحي سوي الوصل مالت 500 الف وانزلي للعمليات
رحت سويت الوصل طبعا الدفع مقدما سواء نجحت العمليه او فشلت
دخلت اختي للعمليات وبعد ساعه طلعوا الطفل (ازززرك مخنوك )ركضت وديته للخدج لكيت الممرضه نايمه كالت اهوو متشوفيني نايمه كتلها الطفل تعبان
كالت امري لله جيبيه بعد ان انطيتها القاسمه الله
واخذته مني على اساس تسويله اللازم وتنظف معدته وتخليه على الاوكسجين وهاي الشغلات
رجعت للعمليات علمود اختي وثلاث ساعات انتظار
ماظل صبر عندي من الخوف على اختي
كسرت الباب مال العمليات عليهم (طبعا جانت المستشفى تصوصي لان الساعه جانت 2 باليل)
فتحوا الباب كالت انتي اخت المريضه كلت نعم
كالو المريضه تعرضت لنزيف حاد جدا وهسه نحتاج 5 بطاله دم (ياابه على الي صار بيه الله لايشوفها لاحد ياربي)
انطوني ورقه مال دم والمطابقه طبعا مصرف الدم اللي بلمستشفى مابيه دم لازم نروح للمصرف الثاني مدري وين انطيت الورقه لزوجها وهو راح يدور على دم
طلعو اختي وحالتها شبه ميته لان صفره صفار مال موتى
كالو منصعدها للخاص خلوها بلعنايه المركزه بالثاني(وشلون عنايه عيني)
طلعناها وشالنها المعينات( طبعا الخمسات تركع)
المم خلولها دم وصار عدها خفقان لان الدم كان بارد ثلج مع العلم احنا تبرعنه بلدم اخذو الحار وانطونا بارد
اماااا الطفل
اخخخخ عليه
رحتله للخدج لكيت الطفل بره ولونه ازرك مختنق
بقينه على هذه الحاله يوم ونص والطفل بره الاوكسجين لان محد شاف حالته
اخذناه لطيبب اطفال بره المستشفى كال هذا الطفل الرئتين مالته مكاملات
لعد مافحصوه بالمستشفى
كتله لا والله
كال المفروض هذا الطفل يحتاج اوكسجين 24 ساعه من ساعه الولاده فقال روحي هسه للطوارئ كبل وكليلهم دزني طبيب فلان هسه همه يسوون اللازم
اخذته على اساس للطوارئ يخلونه بلحاضنه اتصل الطيبب على الطبيب المقيم ووصاه بينه
رحت للممرض كتله عيوني هذا الطفل نخليه بلحاضنه لازم وعلى الاوكسجين لان الرئتين مالت ما كامله محد يسمع
يمعودين ياناس ماكو....
وكفت بالنص وكمت اصيح يااعالم الطفل راح يموت ماكو واحد ابن حلال يباوع عليه
حطوه بلحاضنه وخلوه بعد ما عيوني ورمت من البجي
لكيت طفل بصفه نايم شبيه هذا الطفل مااعرف فسألت الام عليه قالت كان منشول وصدره متنك
حطوله بطل مغذي كبير ونسوه
كام المغذي يطلع من خشمه ومن عيونه ومن حلكه
بدو يضربو ابر مدرره
علمود يفش لان مورم ورم يخوف والله
اني من شفت هذا الطفل شويه همي هان عليه لان الطفل حالته يرثى لها
المهم
الطفل الثاني بدأ يتقيئ دم
وطفلنه صارت عنده تشنجات وبعدين
ماتو اثيناتهم واحنا واكفين لاحول ولا قوه فقط البكاء على الظلم الي تعرضناله من قبل كادر يقال له الانسانيه (الكادر الطبي)
الله واكبر يا ناس
؟
؟
اما اختي انتو اريدكم تتخيلون وضعها
حالتها حاله
واني هم مصدومه لحد الان
وهسه
المن نشتكي على وضع بلدنا المتدني من كل الجهات
ونرجو من المسؤؤلين وصاحبي الشأن
النظر في هذا الامر
ملاحظه
اسم الزهراء اكبر من المستشفى المفروض يرجعوها على الاسم القديم لان يليق بيها اكثر لانه اسم يدل على التسيب والاهمال والعنجهيه والفساد المادي
اسفه على الاطاله
بس حبيت واحد يسمعني
رد مع اقتباس
