الفركة البين طير وطير غيمة
وانه استحرم الاغاني اسمعها والله
بس فكيت ريجي بيا حريمة
حرامات انترس كلبي حرامات
كلب حاسد وادور عالقناعات
خاف من الهجر ياكلبي بس عيش
الجبان شكد يموت ومرة ما مات
جهراً ليش تتندم على الفات
الاخرس كل صلاة ترتيله اخفات
اليسولف حلمه ياخذ غيبة الليل
واذا ليلك تزعله بيا سمه تبات
يكلبي بنية تقصد بالحجي شبيك
انثها يمل حجي الاشارات
يقوس بلا وتر سهمج غصن صار
صرت نيشان بس بيش ترمين
السيف بلاية قبضة شلون ينشال
يجرح ايدج كبل لا بي تجرحين
يل كلتيلي مالك داعي ياشون
قفل باب بسجن مابي مساجين
ضحكت هواي من رديتي تبجين
النذر يضحك على الماعنده سجين
لا..
بجيت هواي من رديتي تبجين
ودريت الموت رجعه الطين للطين
وضحكت هواي من رديتي تبجين
بكد ضحكج لمن قررتي تنسين
اودعك كلتي لا كبل الندى يطيح
اذكرج؟ لا حشاج انتِ تذكرين

اطير من الفرح كلتيلي بس عود
وشكو ضحكة ببشر تلكاها بيه
رجعت ومن شفت مكفاج شكيت
طرتي من الفرح؟ طرتي من ادية؟
بوكت الافعال كلها بلايه نيات
اجيب بلا فعل بس كلني نية
حرفين بحرف مزجينا خنصير
مثل رسم الحروف الاجنبية
كلتلي السهم من تتركه يعيش
روحي تعيش تبقى تموت بيه
سم الحية بيها بلايه تأثير
بس يكتل اليضوكه بلايه حية

اعاتب روحي مدري شلون ردتك
انه عاكولي اترف من وردتك
وجنت ماي واعرفك انت مو طين
مااعرف شجاني وبله زدتك..