الشايل من الروح ثگل ذنوبها
شلون أنسه
وانته ترچية صفنتي أواهسي
وكل رفّه بظنوني تطگ هور وعتب
الشمس ماتعرفني شحچي
الغربه نسّتني شچنت
الگاع مدت روحها وشهگت عطش
وطگت بروحي السواجي
والبساتين العفتها حلوگ مامر بيها
حتى الماي من رشگة حلم
يامنارة سمه عيوني
الشايل من الروح ثگل ذنوبها
يادليل التاه وتلگاه جرح ظنّه يلجمه
جيت فــَــي ومستحي اتلگاك صفنة
ظل كسر واهس الملگه
جيت چف
وبابي ماظل بي ولا شهگة هله
من چنت ماي وطواريــك خضار
الغيم كحلة گصب مغسول بغنه
من چنت طين اشتهيتك عود هيل
مِفرع بوجهي النده
اشتهيك بفحطة الغرگان
ويصحله جرف عابر خليل
بين مايك والعذاب وطين روحي
خضّر افراگك عطش
وبصمة السچين من يمسح وجعها ؟
فزز بروحي الهوه
صوتك الاسمر لحن مشّط ظنوني
كون امد طيشي عله صدرك
ودّي اكاسر طولك بليلي وأغنّي
هناك يم فــَـي خدك النعسان هيل
ياربيع العافيه چم بوسه الك بيه واگولن
خلگي ريل
ياحلم ريحان بللني خضار
وانتشيت لسمه ظنونك
روج خزرة مستحاك ومستحاي
الواگف شراع وخلگ سفاني ليل
تدري جرحي استورح الآه واجاك
تدري من صحتك
نـِـفس بير انكسر بيه وبچيت
صاحت الدنيه وراي
ياضوه المايع بظلمة مستحاه
غطي روحي بنشغة زلوفك حبيبي
البرد طفّه الحيل بيه
سنيني نگعت دمع من شمّت عيونك
بيها ريحة ما ارد
وافتهمتك ...
بساعة وداعك گمت نص عين تحچي
ليش وآنه حچايتي بگد روحي تطلع
ليش يابرد السوالف تنگلب موگد قهر
ليش يا اول حلم دگ باب عيني
تنطفي بروجة سهر
روح ياجرف الظنون
امّودع دموعي وغربتي
منقول
رد مع اقتباس