زهرة الرمان
زهرة الرمان بالشعبي__________________________________________________ _____________________________________
ينعش گلبي شوف عيونچ الشّهلات
واسكر بيهن ومن نظرتچ اسعد
يسحرني جمالچ جوهر البنيان
فرحان وبديّه الردته والازوَد
باجواء الخدود ايذوبن البوسات
وشفافچ عليها شفافي تتصيَّد
ماهمني العقل يرفضها بالطگاگ
خلي گليبي بسوادينه يتعربَد
مو عيشه اذا مابيها حب هيهات
وگلوب الي مابيها عشگ ترمَد
وحبيبي سند يصدگ وفى واخلاص
ونبض گليبي من نبضاته يتورَّد
روحي مشتِّتَه ولمَّت بگايا الروح
واسمچ يالحبيبة بروحي يتجسَّد
صدگيني العمر گبلج فلا محسوب
كلها احزان وما بيها فرح ينعَد
يا نسمة فجر بالعنبر وبالهيل
ياوجه الگمر ياغيمه من ترعد
بغيابچ أمِل وبجيتچ آمال
فرحه وغيث وبسمة اعلى الوجه تنشَد
وتمر بالحشا وتنعش جميع اعضاي
ما ارافگ ابد كل حيره واتنكَّد
وبشوگي نقش كل الجمال البيچ
وعيوني بشعاع الشمس تتمدَّد
يفتنها حسن وجناتچ الشگرات
وبليل الشعر تنتعش تتوسَّد
نغمتها نهاوند وصبا وبيات ١
على عود ووتر من نوع( المبرمَد)٢
وبألواح (سيسم)٣ من صنع (منصور)٤
وبريشة المبدع( سامي)٥ تتردَّد
تتمايل غنج شو چنها غصن البان
وكليبي يتراگص ينزل ويصعَد
رگصتها سحر ذبت عمل وفنون
تتراجف لحم حرگتلي سابع جَد
وبرقة زلال يشيب منها الغيث
هذا الينزل من الغيم الملبَّد
عمري ماشفت عجبه وعجب وعجاب
باذهاني خيال الحسن يتمجَّد
چن الباري خالق كل عسل بالكون
من حلگ الحبيبه العلَي ما ينسَد
من خدها سگت كل وردة بالجنَّات
وتسعد كل حزين من القهر مُجهَد
بالمنطق خبيرة عشگ كلها احساس
وطب لكل جرح بالدنيا متسرمَد
كل واحد يحب يتعب ويلگه الضيم
بس وياها ينذل ضيمي يتبربَد
اشوفن روحي طير ومثلي ماموجود
بس المثلي عاشگ نفس هالمشهد
والعاشگ مثلها زهرة الرمان
خل يبشر سعادة گلبه تتخلّد
چن فاگدها لكمه بحلگ المجانين
والرافگها يغنم عايش بسؤدَد
الهوامش
١- نهاوند وصبا وبيات : من اجمل المقامات الموسيقية بأنغامها
٢- المبَرمَد: نوع من اجود الاوتار بالعالم
٣- السيسم من اجود الالواح يصنع منه اله العود
٤- منصور : من اكبر صانعي العود في الشرق الاوسط ومقره في قضاء الزبير في البصرة
٥- سامي: هو الاستاذ سامي النسيم
اول من درسني اساسيات العزف على العود في بداية الثمانينات وهو الان مدير دار العود العراقي وورشة صناعة الالات الموسيقية
_________اسماعيل القريشي
الاثنين ٢٠٢١/٣/١
رد مع اقتباس
المشاركة الأصلية كتبت بواسطة اسماعيل القريشي
