ممكن ابن ملجم جان مظلوم!_حسين الساعدي
يطَلعون ابن ملجم جان مظلوم!
حسين الساعدي
؛؛؛
اليشوف الحقيقه ايشوف الهموم
ويصدمه الزمان ويبقه مصدوم!
؛
لو عندي وجاهه اتوله العيون
جان ابسطره وحده اعميها للدوم,
؛
اعيوني اتعاند ابشوف اليخربون
وبدمع المجمر تكعد اتلوم!
؛
اليسكت عله الحق ايصير ملعون
تمنيت أخرس ولا أبقه مهضوم!
؛
ابكل يوم اكولن باجر اتهون
وباجر يخليني اترحم اليوم,,
؛
عشت كوه عليه وعمري مرهون
لو بيدي كبل هالدنيا مطموم,
؛
ما جان انقهر لو هسه مدفون
وما دمع العيون ايغسل اهدوم!
؛
الصبح بيتي حلو ابعين اليشوفون
وقت المغربيه اتشوفه مهجوم!
؛
شفت عين اليقين ابعقل مجنون
وميزان العدل بعيوني مثلوم,
؛
مرغوب الجذب ضلوا يجذبون
من صار الصدك ماجنه مفهوم!
؛
ابأاهل النفاق اتخيب الظنون
يخلون الجرح كل ساعه ملجوم!
؛
يمدحون السمج لمن يجوعون,
ولمن يشبعون ايصير مذموم!
؛
خذوا من عدنه كلشي وما يقنعون
ميهمهم العاش ابعمره محروم!
؛
(الملك لله) على البوكه يكتبون
معناها الحرام امن الله مقسوم!
؛
المجرم لو سكر ويه اليحكمون
اتاكد بالضحيه ايصير معدوم!
؛
قانون العداله ايدوخ الكون
ما رادوا ندوخ اخترعوا اعلوم!
؛
لوما بالكتاب ابأيه مضمون
جا كالوا جذب شنسوي بالصوم!
؛
اذا واقع نفاق الناتج اشلون؟
ينفخون الهزيل الخاطر السوم!
؛
مسحوا درب الله اعله اليمرون
وخلوا درب باطل هسه مرسوم!
؛
لاجل المصلحه ابكلشي يضحون
يطَلعون ابن ملجم جان مظلوم!!
؛
ابرشوه امن الشمر راحوا يكولون
السيف امن ايده طاح وذبح معصوم
؛
يضحكون اعله ربهم من يصلون
وشيطان ابكلبهم جوه مضموم!
شيطان ابكلبهم جوه مضموم
حسين االساعدي
ح
رد مع اقتباس
المشاركة الأصلية كتبت بواسطة أبن ألأشتر
