سكته مكسوره بطعم بوسه جديده
جست روحي من المحبه
خفت حد الموت ،يحبيبه المحبه
جست. اصابيعي وخفت
نجمه مشتعله همت
بالحنين ..أنتَ ..والليل الصعب سكته
سكته مكسوره بطعم بوسه جديده
يا سر النجم مفضوح ، واحزانك جديده
هدم حايط حنيني ، وروحي تاهت بالرياح
صرت اخاف من الطيور ...
اتحرك بدمي الجناح
وإنتِ حركتي الرياح
بالجهات اليّه ، واندارن بروحي
مري يحبيبه الشته يدك باب روحي
ومالي حيل ويه المطر تگضي السوالف
وإنتِ بأول زخه
نجمه زغيره نزلت بالسوالف
جدحت بروحي ،وهدم حايط حنيني
لن محبتنا سؤال ..
دخت من لون السهر
تميت بالحيره نهر
والسهر مثل الضوه البلبيت
يالبراري ....
بالحنين وبالرمال
يرسم الخطوه سؤال
يمته يفتح بالعشب باب الجواب؟
نركض بكل النوايا...
ثيابنا تخضّر التراب
نركض بهذا العمر، يحليوه ودروب العذاب
تلتفووتاخذنا ونرد
تلتف وتاخذنا ونرد
وآني ...وإنتِ ....والعذاب والمحبة
تلتف وتاخذنا ونرد
للبعيد ...تكبر وما يتسع كل الجواب
علي الشباني
رد مع اقتباس
