هنا

[مـصطفى]

طبعاً خلال هالشي راح تمر بكمية محادثات كبيره حته توصل للي تريده .. طبعا كنت مستمتع بيها ، بس لازم افهم كلشي ينحجي حتى استمتع اكثر ، شلون طريقة التعرف وشلون تسوي المهمات المطلوبه منك حته توصل ،فكان دافع الشهوه الكبير يخليني اروح واترجم واعرف المعاني ..
ماتتصورون هالشي خلاني شلون اكدر احفظ كمية مصطلحات ومعاني مو طبيعيه ..
(ممكن هاي تجربه محد مسويها ويستغل هالشي بهالطريقه، بس اني كنت مضطر اسوي هالشي لاني شخص اريدانجح )

بالنسبة لشعور الفرح /
كان هو اهم دافع يخليني استمر للامام، شعور الفرح مرضي وممتع .. كنت مدمن عليه.. لذلك حاولت اخليلي كم هدف واحاول احققهم وبعد ماانجح احس بهالشعور اللي يخليني احس بالنشوه.. رغم صدكوني هواي من اللحظات مرت بيه ..
لحظات فرح كنت وحدي ومحد كان يشاركني هالفرح او يهتم .. رغك هالشي هذا كان حافز لحتى اصنع لنفسي ناس تفرح وياي
لذلك صنعت لنفسي مجموعة من الاصدقاء اللي ميتقدرون بثمن
(وبالنسبة اليه هذا أعتبره أفضل نجاحاتي)..

[مـصطفى]

ملاحظه عذراً اذا تكلمت عن نفسي بس اني اعتبرها تجربه مفيده وممكن ينتفع بيها غيري..
وبلايام الجايه راح اسولفلكم على هواي من الطرق النفسيه المفيده بكافة مجالات الحياتية..

[أبن ألأشتر]

الحجي المعدل والمفيد حتى لوثقيل عليك
تشعر انك مستفيد من وجهين .
الاول .متعة ومن خلال المتعة تظل تقرأ تبحث عن الاكثر ممتع
والثاني .
يخلص الحجي تلكه روحك مستفاد شيء كنت غافل عنه .
دخلت وماكدرت اطلع الا وصلت النهاية
ولما انتهى الكلام تمنيت بعد اكو حجي .
اشكرك صوفي
استمر كلامك درر بالدرر

[مـصطفى]

الحجي المعدل والمفيد حتى لوثقيل عليك
تشعر انك مستفيد من وجهين .
الاول .متعة ومن خلال المتعة تظل تقرأ تبحث عن الاكثر ممتع
والثاني .
يخلص الحجي تلكه روحك مستفاد شيء كنت غافل عنه .
دخلت وماكدرت اطلع الا وصلت النهاية
ولما انتهى الكلام تمنيت بعد اكو حجي .
اشكرك صوفي
استمر كلامك درر بالدرر

هذا هو فحوى المدونة
كنت انتظر قدومك لتزرع زهرة الشكر وتسقيها بماء الاحترام
لك مني كل الود والورد أيها المحترم

[مـصطفى]

راح تتعالى الأصوات بالدعاء على الظلمة والسياسيين بعد اقرار الموازنة

عمي اكو فرق بين النصر و الإنتصار،
من تدعي ب(النصر على الفاسدين) معناهه تريد تظل گاعد ابيتك وربك ينزل ملائكة ،يتظاهرون ويطيحون الحكومة، وينتخبون بدالك
هذا دعاء غير مقبول ولو استجاب لك معناهه راح يمضي لك تكاسلك وجبنك

الدعاء الصحيح هو (الرزق بالانتصار) لان الانتصار معناه انك جاي تعمل بالواقع ،عمل ميداني لتغيير الواقع البائس وتطلب من ربك العون والمساعدة والتسديد (هنا يكون الدعاء بالانتصار) وليس (النصر الدليڤري الي تريده يجيك جاهز)

رب العالمين ما يربي عباده عالكسل…. مريم بعظمتها وبحال ولادة وگله (هزي اليك بجذع النخلة) عود وراهه (يتساقط عليك رطبا جنيّاْ)
يعني تحركي سوي حركة وانا اسدد حركتچ ،ولو ما هازة الجذع ما يطيح رطب وتموت جوع

فاحنه شعب نستاهل وبكل جدارة الي يصير بينا ،وابقوا انتظروا ابو الدليڤري مال (النصر الجاهز) ولو نموت ما يجي النصر هيچ.

[مـصطفى]

المظاهر خداعة والها تاثير
بس هاي حالة سلبية مو ايجابية

واذا تريد تشوف بعينك البس بدلة عمل وروح اشتري او ادخل مولات وشوف تعامل ابو المحل او حتى نظرة الناس الك شلون تختلف عن اذا جنت كاشخ ومرتب

وهاي مريت بيها طيل فترة البناء اغلب الاوقات لابس بدلة العمل لأن مريحة بالشغل فمن اروح لابو الانشائية او اشتري شغلات مهمة اشوف تعامل ابو المحل يختلف لأن حسباله عامل وحتى نظرة الناس الك بالشارع باستصغار للاسف

[مـصطفى]

عيد سنة بابلية آشورية "أكيتو" سعيدة لكل سكان المشرق
بعض التوضيحات الأكاديمية المهمة:
1- أول من احتفل بالأكيتو هم السومريين في جنوب بلاد النهرين. ولكن أكثر الاحتفالات دقة، والتي استمرت لمدة 12 يوم، جرت في بابل الأمورية والكلدية. عليه أي وصف لهذه السنة بأنها سورية أو عراقية ذو طابع قومي بعيد عن الدقة. واذا كان لا بد من وصفها بحدود البلاد الحالية فهي أشد ارتباطا بالعراق منها بسوريا.
2- الرقم المستخدم حاليا لا دليل عليه أبدا وبلا معنى لأن الشعوب القديمة كانت تدون التاريخ بأسماء الحكام والأحداث المهمة وشمل هذا الرومان أيضا.
3- في كل عيد أكيتو "رأس سنة بابلية-آشورية" أتساءل ان كنا اليوم نحتفل به في موعده الصحيح. يعلم الجميع أن بلاد النهرين أوجدت أقدم التقاويم في العالم، لكن ذلك التقويم لم يكن شمسياً بل قمريًا. مع ذلك، كان التقويم النهريني القديم صحيحاً ولا تتغير فيه الفصول، حيث تتم اضافة شهر 13 كل سنتين أو ثلاثة، بعد شهر آذار لتصحيح الفرق بين التقويم الشمسي والقمري. في الوقت الحالي، وحده التقويم العبراني يتبع ذلك بالنص باضافة شهر آذار الثاني. وذات التقويم كان يعتبر نيسان قديمًا رأس السنة العبرية، ولا يزال الأول من نيسان هو رأس السنة الدينية اليهودية، مع ان قلة من الناس يعرفون ذلك. لكن هناك فرق بين نيسان حسب التقويم الشمسي الحالي ونيسان التقويم العبراني. ففي هذا العام على سبيل المثال، صادف الأول من نيسان العبراني يوم 14 آذار من التقويم الشمسي. فهل يتوجب تصحيح الأمر باعتماد التقويم العبري للاحتفاء بنيسان أو محاولة العمل بالتقويم البابلي القديم بالضبط لتحديد رأس السنة البابلية الآشورية.

أتمنى للجميع عام سعيد ملؤه الخير والبهجة

[مـصطفى]

الايد إللي توجعك إقطعها !
مرات اكو شغلات تصير وياك تجيب وياك نتيجه عكسيه
-يعني لو القميص الي احبه ياخرني على شغلي علمود اكوي ، خلاص مو لازم البسه !
-لو الأكله الي احبها راح تخليني اسمن او تاذي معدتي ، خلاص بلاها مراح اكلها !
-لو المُكالمة الي انتظرها راح تضوجني او تغثني، خلاص ماارد عليها مهما جانت مُهمه !
أكيد كلامي ميقتصر على قميص ، او مُكالمة ، او أكله !
القصد مِن كلامي أنو اكو مرحلة بحياتك ، او لحظة مُعينة بيومك لازم تعرف بيها تستغني عن الأشياء مهما جنت مُتعلق بيها ، وتحبها ، أو حتى متصور إنك متكدر تعيش بدونها ، لإنك راح تتفاجئ انك كدرت تعيش مِن دونها ، طبعاً تضوج وتمُر بأعراض إنسحاب من البداية بس بالأخر تلاكي نِفسك صحيت ، و رجعت انسان طبيعي مِن اول وجديد ، ف ياريت تِتعلم شلون تكدر تستغني عن أحب الأشياء الك ، واللي انت تعرف هي كاعد تاذيك
حياتنا مليانة قرارات مؤجله لازم نحددها ، وقرارات مصيرية نتجاهلها ، بس لمُجرد ان احنه مكادرين نقتنع راح نستغني عنها !
بمعنى آخر اكو أشخاص نغشم نفسنا نحن محتاجيهم ودائماً نحطلهم اعذار وننطيهم فرص بس الى متى !
أحياناً ضروري أنك تكبر عقلك عن شغلات اتعودت انك تتمسك بيها، علمود تكدر تكمل حياتك بشكل طبيعي..

[مـصطفى]

الكاتب الامريكي Mitch Albom يكول :
"Nothing haunts us like the things we don't say"
_ماكو شي يطاردنا بحياتنا كد الشغلات اللي ما حجيناها..
- طبعاً البارحه كنت رايح اخذ طلبي من فد مطعم بعد ما واحد خيّر كربسني بعزيمة ٫ وخلال مااني واكف انتظر اكو موظف سوه حادث صغير ووكع الماعون يمكن ، فصاحب المطعم ماقصر وياه " انت غبي ، شبيك ماتشوف ومن هالكلام.. ،"
اللي لفت أنتباهي ردة فعل الموظف الشاب ؛ وكف بأستقامه وهو مبتسم وكله " تره صار حادث مو مقصود واني غلطان بس ياريت ماتحجي بهالاسلوب وياي .. "
كان واضح كلش هو منزعج من الكلام بس ردة فعله كانت رهيبه ..
_طبعاً اي شخص بينا ممكن يتعرض لهيج موقف وكل شخص له ردة فعل:
رد الفعل العدواني : ممكن يرد الغلط بالغلط وبعصبيه ويكبر الموضوع .. ومن خلال هالاسلوب يحاول يعوض شويه من الاذى العدواني اللي تعرضله..
رد الفعل السلبي : يرد باسلوب تنازل ويتقبل الاهانه ويسكت او ممكن يسويها بضحكه ويكون موافق على اللي كاله (طبعا هالاسلوب هواي من الناس تستخدمه) طبعا هو ممكن يتجنب المشاكل ويمشي الامور طبيعيه / بس هالشي ممكن يخلق أنسان مشوه انسان يتقبل الاهانه او انسان كابت وبكل فرصه يحاول يهين غيره..
رد الفعل الايجابي : وهو اللي استخدمه الشاب ، "العفو أستاذ لا تكلمني بهالطريقه ، لو سمحت حتى لو انا غلطان بس مااقبل بهالاسلوب..
هنا هو صح غضبان بس مركز ويعلن عن غضبه بحزم ووعي ! وبشكل ناضج..
............
الغضب محتاج يكون ملعن بقوة ، ظاهر بعزة ، واضح بحزم .... طالع على السطح وماخذ مساحته الحقيقية من إدراك و سلوك الفرد ..... مٌقدَر قيمته و حتميته في تحقيق التوازن و السلام النفسي للإنسان ..

[مـصطفى]

أكو كتاب أسمه The 4 hour work week ل Tim Ferriss وينطيك فد معادلة يخليك تحسبها حتى تقيم فيها حياتك بشكل عام وهي The cost of inaction أو تكلفة عدم الحركة أو عدم اتخاذ قرار لوضعك الحالي :
....................................
وفيها يخليك تكتب الاحتمالات اللي ممكن تصيرلك بحياتك لو بقيت عايش مثل ما انت .. مثلا :
- لو بقيت عايش بلا رياضة لل ٢٠ سنة الجايه شنو رح يصيرلي ؟
- لو بقيت عايش ال ١٠ سنين الجاية ب نفس مكان عملي = شنو راح يصيرلي؟
- لو بقيت عايش بنفس تفكيري عن الناس ( يعني اخاف أسوي الشي اللي أحبه لان الناس راح تشوفني ب نظرة معينه) = شنو راح يصيرلي بعد ٢٠سنة مثلا..
- أو لو بقيت عايش بلا ما أطور من نوعية علاقاتي ( يعني بقيت عايش وسط ناس ضايعة ) = شنو راح يصيرلي !؟
- أو مثلا لو بقيت عايش على أمل وحيد وهو ان لازم يجيلي عريس أو اتزوج= شنو راح يصيرلي بعد ١٠ سنين ( هالشي للبنات عندنا بس طبعاً أكيد همه ماعدهم هالتفكير)
....................................
طبعا هو يخليك تكتب الاحتمالات هاي بورقة و قلم و يخليك تقرأهم كل يوم!! ( من غير اي حكم على نفسك ابداً مجرد احتمالات طبيعي و ويخليك تكتب أسوأ الاحتمالات هم)
.................................
بالنسبه ألي انا جربت الموضوع هذا وأذا تردون الصدك فهو موضوع مرعب الصراحه.. ويفوقكم أذا ما جربتوا(ما أكولك حماس ومن هالكلام) بس بواقعية شديدة جدا يخليك تشوف مستقبلك بشكل بسيط ( لأنك تكتبه كدامك) طبعا هألشي بلا مبالغه خلاني اغير جزء كبير من روتيني اليومي ومن ساعتها(هيج يعني مال ٤ سنين ) تغير جزء بسيط من المستقبل هذا وفعلا صارت شغلات من الأشياء اللي كنت خايف منها ... بس تجربة تستحق التجربة!!