أكو تأثير بعلم النفس إسمه controlling by ignoring ، ويعني السيطرة عن طريق التجاهل هذا يشرح شلون ممكن شخص يتحكم بحياة شخص ثاني بس عن طريق تجاهله !
هذا الشي يصير لما تحب شخص كلش ، وتتعلق بيه هواي ، لدرجة إن ممكن تتنازل عن وقتك وسعادتك ومرات حتى كبريائك وكرامتك في سبيل بس ترضيه ، بس هذا الشخص راح يگوم يتحكم بيك بدون ما يدري!
تفتح الرسائل راح تشوف نفسك بس أنتَ الي تدز والرد أغلب الأحيان يكون جاف وخالي من المشاعر ، وبالرغم من إن أنت تحب تحچي وياه إلا إن تخاف تحچي وياه هواي وتخاف تشاركه لحظاتك الحلوة وتفاصيل يومك ظنًا منك إن ممكن تزعجه أو تكون overrated أو خوفًا من فكرة إن هو يكون أصلاً مو مهتم يعرف أخبارك !
راح تبدي تدخل مرحلة من التوتر والتردد بأي رسالة تكتبها وتحسب حساب كل حرف تكتبه ، راح تحاول إن تغير من طبيعتك وتتقمص شخصية غير شخصيتك في سبيل بس تسعده لهذا الشخص ، راح تبدي طاقتك تُستنزف تدريجيًا وإحترامك لذاتك يقل ، راح تجرب إن تبطل تدزله رسالة على أمل إن هو يبادر بس تنصدم إنو ممكن تعدي أيام وليالي وهو ولا يمه السالفة !
بعد أسبوع تقريباً من القطيعة تشوفه يدزلك رسالة عادية كلش كأن تكون ( هلو شلونك ) ، إسلوب يوحي بأن مشاعرك ما تعني اله أي شي ! ، بس بسبب تعلقك الشديد بيه وحبك اله وگلبك الفطير والطيب راح تبدي آمالك ترتفع من جديد وكأن شيئًا لم يكن وترجع تحچي وياه وتدزله رسائل مثل قبل وأكثر ، راح تنصدم بالردود الباردة والمتأخرة ، بالصد والتجاهل ، وهذا الشي راح يستنزف جزء چبير من طاقتك إلى أن تتلاشى تدريجيًا مع كل محاولة جديدة ، الى أن تتلاشى كليًا وتدخل بحالة من الكآبة وكره الذات والتوتر والإنعزال عن المجتمع لفترة طويلة ..
لهذا لا تعاتب أحد لأن مو مهتم بيك لو لأن ما يحبك مثل ما تحبه ، أو لأنو ما مقدر مشاعرك تجاهه ، سلوك العتاب هذا يكون مثل الإستجداء بطريقة غير مباشرة ، وأي رد فعل بإهتمام مفاجئ أو اظهار مشاعر من المقابل راح تكون في الأغلب مجاملة أو شفقة
ميصير نعاتب ناس على شغلة همه أصلاً ما حاسين بيها..
رد مع اقتباس
المشاركة الأصلية كتبت بواسطة فرانكشتاين
