السلام عليكم
طبعا اليوم اول يوم ادخل لهذا القسم
عجبني ادون بعض القصص المريت بيها والمواقف بشكل متتالي اجزئها
واتنمى تنال استحسان القارئ الكريم
رح يكون مزيج بين الفصحى واللهجة الدارجة حتى يفهمها المثقف والمعتاد على اللهجة الدارجة
ابديها بأول موقف طبعا قبل كم سنة
كنت مار بمشكلة تصدع الراس
فاعزلت نفسي عن الناس
الى ان اجا يوم اختنقت من الجلوس بالبيت فقررت اطلع امشي الى ان اهلك من التعب
فأخذت طريق طويل امشي
الى ان صار وقت اذان الظهر فقررت ارجع
برجوعي صار طريقي على جسر
الوحيد اني كنت امشي ع الجسر
شفت من بعيد بالطرف الثاني سوادة اتجاهي فعرفت أمرأة دتمشي واصلة لربع الجسر
بدت التساؤلات بذهني هاي وين رايحة بهالظهرية
فتقاربنا لبعض عند منتصف الجسر واني انظر لها اشوفها تطل على دجلة من محجر الجسر
دققت النظر واذا بيها حافية فصار عندي حدس انها مجنونة او ماشابه
سارعت اتجاهها هي شافتني وتقربت للمحجر اكثر
اني عاد حسيت تريد تنتحر فهرولت اتجاهها هي صعدت احد اقدامها ع المحجر
ركزت واذا امرأة خمسينية بالعمر طويلة
صرخت عليها صوت قوي حتى اخوفها فضلت تنظر لي برهبة اجا ببالي اكوللها حجية المي بارد لا تذبي روحج هههههه تذكرت جاك
المهم شغلتها بصياحي وهي ضلت تغلط علي الى ان وصلت لها هي حاطة رجلها الثانية ع المحجر اني مسكت طرف ثوبها وسحبتها قبل لا ترمي روحها بالنهر
طاحت ع الارض بس كامت لي كل كف تنطينيا ولا الثاني بلهجتنة ( شبعتني راشديات ) اني تحملتها لان شفت عيونها مورمة من البكاء وضليت احاول اسيطر على ايديها
عاد هنا السواق توقفوا واجوني ركض كضوها وياي واكو جنود من سيطرة الجسر اجوا ركض يرمون عبالهم عندي مشكلة وياها
المهم اتصلوا بضابطهم اجا خذاها وخذوني وياها لتحقيق عاد اعترفت هي كانت تنوي تنتحر لان اكتشفت زوجها صارله 5 سنين متزوج عليها
دونت شهادتي وطلعت رجعت لأهلي بهمر الجيش بطلت امشي ههههه
عاد ورا يومين اهلي قالو لي اجت امرأة كبيرة للبيت سائلة عني الجنود و مدلينها علي جاية تعتذرلي ومالكتني
هذا احد المواقف المريت بيها
و لي عودة بموقف آخر
رد مع اقتباس
المشاركة الأصلية كتبت بواسطة سيد الكلمات
