واحد من ربعنا الطيبين , يگول بعد زواجي بفترة , و بعد مراجعات كثيرة للأطباء نتيجة إلحاح الأهل من الطرفين و سؤالهم المستمر عن وليّ العَهْد ( على أساس آني سلطان بروناي) , و بعد ما أهلنا ( هم من الطرفين ) يعني كثرو بالملحّة .. تبيّن أننا لا نستطيع الإنجاب رغم عدم وجود سبب عضوي أو فني أو فسلجي أو ........ طرگاعي
- خوش , و النعم بالله , و الحمد لله .إشبيدنا يبعد رويحتي .
چا غير يفكّون ياخه أهل الرّحَم و الخير !!!
أبدا , إلا يسَوّون حياتك جحيم و يحرگون أعصابك كل يوم بالأسئلة الصريحة و القبيحة و المبطنة عن نفس الموضوع :
- ما الله إلتفتلك ؟ مامِش ظِنّة ؟ ما تتشهى مَرتك ؟
ثم إنتقلوا إلى حياكة المؤامرات التحريضية :
- تره ربّك حلّل أربعة . إخِذ عليها . أبوك يريد يشوف فريخاتك گبل ما تغمّض عينه . إمّك ما خلّت إمام ما راحتله و نذرتله .
- يابه أدري .. و الله أدري .. بس آنه مرتاح و أحب مرتي و ما عندي مشكلة . و ما يهمني الموضوع .
آخر شي , إنضمت زوجتي للجَوق الموسيقي و گامت تغرّد مثلهم ( بس مو على تويتر) .
مرتي هم گامت تحرضني و تحثني على الزواج بإريحية عجيبة و نادرة عند بنات حواء , و الأغرب هيّه بنفسها راحت إختارتلي عروس و خطبتها !!!!
- يمعودة , عدلي , بدلي , يا بالله عليچ .. ما بيه حيل طلايب . متأكدة ؟
ما فاد . ( أصرّ يصرّ .. إلحاحا ).
چا بعد شسوي ؟ ... قبلت بالأمر الواقع , وأقيمت الأفراح و الليالي الملاح , و جيب العشا , وإعزم الأقرباء فرداََ فرداََ , و كل شي تمام , و زفّوني الشباب . .. و عريّس و ربعه يزفّونه .
و فجأة طفت الكهرباء ... و الدنيا صارت هندس !!!
فكّيت عيني بالمستشفى , راسي إمضَبّر , دايخ ,, و الغرفة تفتر بيه . و الوادم اليمي يصيحون :
- سلامات .. سلامات ... سهلة .. سهلة ... بس عشر خياطات . بالريش .. بالريش !!!
أباوع ... أهلي و صدگاني تارسين الغرفة و ممرات المستشفى , .. و إبطالة الدم و المغذي إمعلّگه ( نص اليشتغلون بالمستشفى عرف و گرايب , و داروني ) .
و مرتي راعية الحفل السعيد تبچي فوگ راسي !!!
- ها خويه ؟ شنهي الوجبة ؟ يا هو الطّگني ؟!
گالت و دموعها تصب مدراراََ عمت عيني عليها الحِنينة :
- آنه ... گلبي ما إطّاني .
- إيه ؟؟؟؟؟
- ما إتحملت , إنقهرت على روحي و إنهضَمِت , شلون يزفّونك على وحدة غيري !!! و صَكيّتك بصَخَريّة !!!! .
- يا بَعَد طُوايف أهلي !!! چا إشگال البهلول ؟؟؟
وراها سمعت أن الزلمة صاروا عنده عشر جهال من مرته أم صخرية , يمكن فتحتله الغدة النخامية , و إنحلّت الچبسة .
رد مع اقتباس
المشاركة الأصلية كتبت بواسطة الرميثي
