روحي اصيله وبت عرب
هيبة مضيف البيها
ماسكنت الظالم ابد
لا رحمت الماذيها
……… .
روحي اشكثر ماسولفت
عنها اشكثر ماصورت
لحظة فرح لا ماشفت
ضيم وقهر گاضيها
…
بيها بواچي بلا دمع
بيها قهر ماينسمع
ذابت مثل خيط وشمع
خل نارهم تچويها
…
عاشرت وادم مصلحه
والجرح منهم ماصحه
تطحن مثل طحن الرحه
وذرت دغش مابيها
…
روحي على جور معلمه
وسنين كاتلها الضمه
عيونها بعالي السمه
تنطر فرج باريها
…
عاشت عمرها بلا فرح
وغيرها الناس بمرح
من طيبته گليبي نجرح
وجروحه ماخافيها
… .
روحي بعطش ضيم وضمه
ونتها توصل للسمه
تتأمل اتصح مرحمه
ورب العرش ناسيها
… .
تطحن گضت ليل الجفه
وعمر المضه عليه العفه
وكتي على المامش صفه
وحشه الليالي اگضيها
…… .
راضي ورضيت بقسمتي
عشرة دغش كل صحبتي
ياناس هاذي قصتي
ادفنها لو أخليها
بقلم : علي الصگبان
رد مع اقتباس