اجمل ماقاله المبدع البصري الشاعر سيف الحلفي
صادفتني اجمل فتاة رأيتها في حياتي..
ولكني,لم استطع التغزل بها,,,وبطولها
ليس لأني لا اجيد الغزل....
بل لأنها كانت مقعده..على كرسي الشلل..
فكتبت القصيده عن لسان حالها..تحت عنوان
(ذكريات على كرسي الشلل)
من حضن امي.. كبل للكرسي اجيت
ما سمعت ال (فدوه لله) ويمشي كام
اتكسرن خطواتي واحساسي بصباي
الكاع صخره..وجانت الخطوات جام
وسجلوني بصف الاول..واستحيت
الروح احسها تفرفح من اسمع قياام
وابجي كل رفعة علم يوم الخميس
فشله اكعد..والعلم بالساحه كام
بالمرايا امنيتي اشوفن طولي يوم
سنين اباوع طولي بفراشي من انام
وأملوني..اباجر واصبر بقيت
وباجر أتأخر.....واجن عشرين عام
كبرنه....والايام تمشي ,,وما مشيت
وانه والكرسي عشت قصة غرام
وجانت دموعي ..بثكل حسرات ابوي
لو حضر خطبة بنات من العمام
ياهو يرضه بطير مكسور الجناح؟؟؟
والسمه كبال ايده غصت بالحمام
الدمعه سوده من الحزن عالخد تطيح
المادره بحزني يضن بخدودي شام
جفوف اديه استهلكت من الدعاء
وضلت لهذا الوكت رجليه خام
ربي..كعد حظي حتى اكدر اكوم
ربي بس كطرة ضوه لحلك الظلام
وافرح ابدلة عرس مثل البنات
صارت الحسرات بالريةازدحام
خطوه وحده...امنيتي امشي..بأي طريق
حتى لو للمكبره لوادي السلام
واحسد المشايا راحوا للحسين
وابجي عالحسين مدري عله الجدام..
للشاعر سيف الحلفي .
رد مع اقتباس
. البيت هذا جميل جدا ومعانيه معبرة للي عايشهه والوصف اجه بمكانه .. ابداعك لا حدود له
