" يسعد لي مســـــــــــــــاكم .."


العنوان واضح ... ويعبر عن مضمون الموضوع ...

واللي يتكلم بكل بساطة .. عن شريحة من البشر صارو بقدرة قادر جزء لايتجزأ من

هيكل مجتمعنا الخليجي ...

العمالة المنزلية ... صارت شر لابد منة ... وإنقطع إرتباطها السابق بالهيلمان والنفوذ

الإجتماعي ... لأنة للأسف صار حتى اللي راتبة مايكمل معاه لآخر الشهر ..عندة خادمة

وموضوعي اليوم ...لاراح يكون عن مشاكل الخدم ... ولا عن أسباب حاجتنا لهم ..

بل راح يكون عن طريقة تعاملنا معهم ...

واللي آدت وللأسف الشديد ...للمنعطف اللي قاعدين نمر فية ..مع ردود أفعالهم ..

من فترة والموضوع شاغل بالي ... ودائماً أفكر فية ...

وهو ..لية تغيروا العمالة المنزلية علينا ؟؟؟؟؟؟

لية كثرت مشاكلهم ومصائيبهم ... ؟؟ لية كثر الشر فيهم ؟؟ والسحر ؟؟؟ والخيانة ؟؟؟

هل من المعقول أنهم تغيروا كذا فجاة ؟؟ بدون أسباب ؟؟

كلها كانت تساؤلات تهاجمني في لحظات خلود مع النفس ...

علامات إستفهام كبيرة ... حيرتني ... لكن من خلال مواقف كثير مرت علي ..

مع مجموعه كبيرة من الناس من مختلف الطبقات الفكرية ... وصلت لبعض الإستنتاجات ..

يمكن تكون صح ... ويمكن لا ... لكنها تميل للصحة من وجهه نظري على الأقل ..



::::::::::::::::::::::


أتذكر من يوم كنت بصف 5 إبتدائي ..وأحنا نستقدم من أندونيسيا ... وعمرة مامرت علينا

وحدة لاساحرة ولا مجرمة ... كانوا كلهم طيوبات ... ويندمجون معانا على طول ....

عمرة مامر علينا هالعمالة أصحاب المشاكل غير في السنوات الأخيرة ذي ..

والسبب اللي فكرت فية .. أن طريقة تعامل البعض مع خدمهم .بصورة تخلو من الشفقة

والرحمة .. كانت مثل أداة للشحن والتعبئة .. شحنت قلوبهم علينا وعلى مجتمعنا ...

تحسون كل وحدة من تدخل وهي ماخذة فكرة سيئة ببالها ... إلا من رحم الله ..

لأنة وبكل بساطة .. كثير من ربعنا ... يعتقدون أن هال 7000 ولا ال8000 اللي دفعوها

عشان يستقدمونها ..كانت سبب وجية يبيح لهم ملكيتها ... وكأنها شنطة ..

يتناسون بكل بساطة ..أنها بشر من لحم ودم ومشاعر وإحساس ...

ويبدون ببرمجتها .... مثل الجهاز الجديد بالضبط ...

ومن أول ماتدخل البيت ... وهي جاية ماتدري وين بيرميها قدرها ... يبدون بقائمة

من المحضورات والغير مسموح والممنوع ..

ومدري من قالهم أنة لين دخلت الخادمة كشري عن أنيابك عشان تخاف منك من أولها

وتسوي لك حساب ....

طيب ..

تتوقعون أن هالطريقة ... ( لاتقولون مانسويها ...شفت ناس بعيني سووها )

ماتخليهم يكونون عنك إنطباع سئ من البداية ..ويرسخون الفكرة اللي سمعوها

من اسلافهم قبل يجون ان السعوديين متوحشين ...؟؟

" مرة شفت خادمة سيرلانكية ..كانت مضربة عن العمل ... ووحدة اعرفها قاعدة تحاول

فيها عشان تنقل كفالتها عندها ... تخيلوا وش تقول السيلانية للحرمة ذي ؟؟

لا لا .. انا مايبقو رووه بيت تاني ... كولو سأودي مافية كوايس ... انا سوف كتير كولو مافي كوايس

!!!!!!!!!!!!!!!!!!!!!!!!!!!!!!!!!!!"

والمشكلة ... لما تجيب الوحدة شغالة ..وتكون هي موظفة .. وتقسو عليها وتمرمطها

همن تروح الصبح لدوامها وتخلي بزرانها عندها..!!!!!!

عجبي .. طيب ماتخافين تنتقم منهم ؟؟؟ ولا اللي عيالها يضربون الشغالة ويوذونها

ولا تقول لهم شي ... " بزران ماعليهم شرهه !!!!!!!!!!!!!! " طيب

وهالبزران ..مانعلمهم الأدب مع الغير ... مانعلمهم الرحمة ؟؟؟ مانعلمهم اسلوب الحوار ؟؟؟

وش بيكون ردة فعلها ..لما تشوف طفل قد اطفالها يمد يدة عليها ... ؟؟

أكيد يابتسحرة ولا بتذبحة بعد ...؟؟

الكبت يولد إنفجار ..هم تاركين أطفالهم وبيجلسون سنتين عنهم ... ساعات عند ناس

غير آمناء ... عشان ينتظرون هال 700 ريال ولا ال800 ريال ويرسلونها ل 100 فم ينتظرها

عشان ينتفونها ...

هذا إذا جاها هالراتب بوقتة بعد ...

وانتي لو رحتي السوق وخليتي طفلك ساعتين ولا 3 انواع القلق لين ترجعين ...

" من سنوات كنت ساكنة بشقة في الشرقية .. وكانت فوقي معلمة ... ولين جات الظهر

من دوامها .. استلمت هالخدامة ... وهات ياصراخ وهات ياكفوف .. لاتستغربون ..

إية كفوف .. طاع طيع ...كل ماجيت اطبخ الظهر وافتح الشباك إلا وأسمع الموشح اليومي

والمشكلة على أسباب تافهه .. هذا ليش ماغسلتية طاع ... وهذا ليش موب نظيف طااع

وبين الطاع والطااع ..كم لقب من اللي يحبهم قلبكم ... اللهم لاشماتة ...

والله كرهتني في الشقة وفي الطبخ وكل شي ... لا .. والمشكلة ..تطلع الصبح وتخليها

عند 3 اطفال صغار أكبرهم ابو 4 سنوات .. وياعالم وش كانت تسوي فيهم عشان تنتقم .."

لو ماخفنا على إنسانيتهم ... على الاقل المفروض نخاف منهم .. على عيالنا وعلى أنفسنا ..

والله ياعالم فية ناس .. حتى اللقمة يستخسرونها فيهم .. ومايعطونهم غير فضلة

هذا إذا بقت ...

تصدقون فية ناس يروحون لمطاعم المولات ويقعدون ياكلون والشغالة يخلونها واقفة جنبهم

ومايشترون لها اكل !!!!!!!!!!!!!!!!

طيب لية ؟؟؟ موب بشر هي ؟؟؟ ماتشتهي النعمة زيهم ؟؟ تلقونها واقفة مسكينة وعينها

في الناس اللي ياكلون ... ياللة ... راس مال الوجبة ب10 ولا 15 .. ماراح تاثر دامكم طلعتوها

من البيت ... ولا خلوها على الأقل عشان ماتشوف الخير وتنقهر ...

لا .. ومرة وحدة تقول لي ... تصدقين مسمس .. أخت زوجي مرة كنت عندها ويوم

جت تغرف العشاء كنت اعاونها في المطبخ .. وجت تغرف لشغالتها وشغالتي .. حطت لهم

رز حاف بس !! بدون لحم ولا شكل ثاني ... مع انها مسوية كم صنف عالعشاء ... تقول طيرت

عيوني وأستحيت مدري وش اسوي .. بس سألتها بتحطين لهم شي ثاني ؟؟

قالت لا ... وشو لة؟ . حقتي ماعودتها ..!!!!!!!!!!!!!!!!!!!!!!!!!!!!!!!!!!!!!!! عجبي

وتلقين نص هاللي طبخت بيروح الزبالة ...

ولا عاد اللي لين جت الشغالة وقالت ابي شامبوا ولا معجون أسنان .. وقالو لها طيب هاتي !!!

والله فية ناس يسوونها .. مرة وحدة تتكلم في مجلس وتقول أنها ماتعطيهم وجة في الطلبات

وتاخذ منهم فلوسها عشان يحسون بقيمة الشامبو ومايسرفون فية ...!!!!!!!!!!

" ياجسرك بس تقولينة قدام الناس "

إذا مبلغ الشامبوا وخلافة عندك يعتبر شي تافة .. فهي بالنسبة لها ثروة .. يااختي أعتبريها

صدقة ... على الأقل اكسبيها فيها ...

وإذا شريتي لعيالك ملابس جديدة ولا هدايا أذكريها لو ببكلة إن شاء الله ..

يمكن فيهم خدم مليانين شر ومايثمر فيهم المعروف ... بس والله فيهم ناس مساكين وراح

يحسبونها لك نقطة ..يذكرونها لك ..

وكلة كوم .. ولا اللي من تدخل الشغالة من الباب .. وهم ملبسينها تنورة طويلة ومعطينها

عباة راس ونقاب ..!!!!! ...وتشوفين هالشغالة وشكلها بعباة الراس والنقاب ...

وهي تخبخب وتتكرفع فيها .. " شفتهم بعيني في مستشفى حق

الخدم اللي يسوون فية الفحص "

طيب ليش تغطوون وجهها ؟؟؟ إذا هي ببلدها ماتغطية ... لية تجبرونها على شي

مو الكل يطبقة من بنات بلدها اللي هنا ..أوكي خلوها تلبس عباية وحجاب

بس عاد نقاب وعباة راس .. ؟؟؟


" وحدة من جماعتنا ...ملتزمة ... وبيتها صغير بس موظفة وجايبة شغالة .. تخيلوا ...

تخليها تتغطى في البيت عن زوجها ... !! لا ومو اي غطا ..وقسم بالله العلي العظيم

شوف عيوني .. جاية تكنس المجلس اللي كنا فية وعليها جلال صلاة روز ...(
مهيب مشرفتنا

ذي خامة أجلة يعرفونها ربعنا
)

جلال غامق وثقيل مغطيها لين رجولها .. ارتعنا يوم دخلت تسحب مكنستها .. عشان الرجل

موجود في البيت ...: !!!!!!!!!!!!!!!!!ياويح قلبي ..

تهقون وش سوت ذا الخدامة ... يوم خلصت مدتها ( مدري وشلون كملتها ) ..

وراح الرجال يوديها المطار .. طبعاً ماقد شافها غير في الجواز بس ..

إلا يوم خلص أوراقها وجا بيدخلها الصالة قالت لة لحظة بروح الحمام ..

وجلس ينتظرها برا .. يوم طلعت ....ََََََََََََََ!!!!!!!!!!!!!!!!!! ! إلا ببنطلون جنز وبلوزة وفاكة شعرها

والعباية مبرومة من قلب بيدها .. يوم طلعت رمت العباية علية وهي تقول (عطي مادام .........)
^
أسم زوجتة

طبعاً أكيد ولا وحدة مننا ترضى ان شغالتها تدخل في المكان اللي فية زوجها ولا تممر

من قدامة ..ولازم يكون لبسها محتشم ..

بس موب تكبسينها بجلال روز !!!!!!!!! يخواتي والله لين نزلت عليك شغالتك بيونيفورم مرتب

ونظيف وريحتها نظيفة أنتي نفسك تنفتح نفسك وتقبلين منا أي شي ..

فهميها وعوديها على إحترام وجودك ونظامك وقوانينك ..

وقناعاتك بس بهدوء ...لأنها ممكن تسوي نفسها تطاوعك ومن ورا ظهرك تخونك ..

ياناس .. الرحمة والشفقة الله جبلها بقلوب المسلمين ... أرحموا من في الأرض يرحمكم

من في السماء ..والله فية ناس حتى البسمة يبخلون بها عليهم .. وإذا جوا يفهمونهم الشغل

يجلسون يرفعون صوتهم ويتحمقون .. لية طيب ؟؟؟

فهميها شغلك بهدوء .. وتحمليها وانتي تشرحين لها طبعك وبيتك .. وأصبري على غلطاتها

البسيطة .. لازم هم بيخربون ويحوسون ..ولازم ياخذون وقت عشان يفهمون نمط معيشتك

لأن حياتهم غير وبيئتهم غير .. ومايولد متعلم ...

يختي بنتك وهي بنتك ورابية معك لما تتزوج وتروح بيتها .. الله من قدر بتحرقة والله من ثوب

بتلطعة وبتسوي فية تواقيع .. والله من شي بتخربة ..ولو بيعصب الرجال عليها بتنجنين

وتقولين ياكافي اصبر عليها لين تتعلم ...

طيب وذي الآدمية ... ليش ماتقيسين عليها نفس القياس ؟؟؟؟

والمفروض مانمسك رواتبهم لوقت طويل ... أعطو الأجير حقة قبل أن يجف عرقة ...

نخلي لنا موعد ثابت كل شهر بنفس اليوم نعطيها معاشها عشان تحس بمصداقيتنا

وتحس أنها بآمان وتقدر تعطي ...

ونخليها تنام وقت كافي نحدد بدايتة ونهايتة حسب إحتياجاتنا... بس المفروض مايقل

عن 7 ساعات نوم ...

والله يهدينا وياكم يارب .. ويكفينا شرهم وشر أفكارهم ...


م/ن


" دمتم بكل الحب "