نهر خوة صرت من رادوا الماي
اخوتي وعافية عمري يشربون
يجون عله الجرف واصعد للحلوك
حتى بهاي ما اقبل يدنكون
وجسر لجدامهم مديت الضلوع
علي بيه ردتهم من يعبرون
ويوم المات جرفي وغمض العين
ولا صرخة اخو بين اليشيعون
عليه اجفوفهم ما شكن الثوب
عليهم جان دمعي يشك العيون
ادين انطيتهم لمشاكف الموت
وبديه بطيحتي كامو يصفكون
سيفي انطيته من احتاجو السيف
وشفت ظهري ولكيته بسيفي مطعون
نسو شارة الخوة تعثر اليبيع
لان حلفو جذب باجر يعثرون
شجرتهم جنت من لسعة الصيف
وتحت فيي شكثر جانو يكعدون
وكتهم من برد صارو علي فوس
واجو مني المواكهدهم يحطبون
مطر مارديهم مبارك غيوم
واكل للزامطو باجر يمطرون
شو ما غيمو بس مطرو جروح
على خدود الگلب بس گلبي شاطر
يفك باب المحنة بوجه العتاب
واصد رماح اخوتي بصدر شاعر
عمر لخيولهم صرت انا ميدان
علي تسحك واصفكلها الحوافر
واصيرلهم شفايف من يطعنون
وابوس اثار طعنات الخناجر
وادفنها المشاعر بلكن تموت
ترد ردود وتخضر مشاعر
خذت طبع الجبل كل طعنه بي غار
ولا شافة السفح مكسور خاطر
مثل موت الشمس هيج انا بالموت
يظمني الليل ويطلعني باجر
ما دام بصدرها برودة الماي
دخلي الدوس بضهور الگناطر
رد مع اقتباس
