شهد الظهور الأول لرجل الأعمال شريف الشوبكي زوج الفنانة ريهام عبد الغفور، عدة مفاجآت بعدما تبين أنه عازف محترف للطبلة وحاول تعليمها الرقص، كما خضع لكورس متخصص في التصوير، قبل الموافقة على الظهور برفقتها في برنامج أبلة فاهيتا، وكشف شريف للمرة الأولى كواليس التعرف على ريهام مؤكدا أنه حاول معاكستها فقط، ولكنها خدعته وتمكنت من الزواج به.
شريف الشوبكي ظهر للمرة الأولى برفقة زوجته ريهام عبد الغفور في برنامج "من الدوبلكس" للدمية الشهيرة أبلة فاهيتا، وتحدثت عنه ريهام أولا قائلة: زوجي مصري بس والدته من ألمانيا، ومكنش له في التصوير ولكن بعد الجواز أخد كورس عشان نتصور كتير وكده، وعمره ما حضر معايا ولا مهرجان ولا تكريم ولا جايزة استلمها.

وتذكر شريف الشوبكي طريقة التعارف بينهما قائلا: أنا اللي عاكست ريهام في الأول بس هي ضحكت عليا واتجوزتنى، وتعودت لما نخرج مع بعض هناكل في مكان المعجبين بيكونوا عاوزين يتصوروا معاها، وياريت الموضوع بييجى على إنى باكل لوحدى وبس ده أنا بمسك الكاميرا وأصورهم كمان.

وتابع شريف قصته مع احتراف العزف على الطبلة قائلا: بدأت ألعب مزيكا وأنا في المدرسة تقريبا في خامسة ابتدائي، وكملت بعد كدة وقابلت ناس أتراك في سنة 1999، وقعدت كام شهر اتعلمت اكتر على آلة الطبلة.

وقالت ريهام عبد الغفور: أنا مش بعرف أرقص وفاشلة في الرقص البلدي تماما، والمرة الوحيدة اللي شافني برقص فيها كنت بتمرن عشان دوري في مسلسل حارة اليهود، وهو كان بيحاول يمرنى ويطبل.

وقدم شريف فاصلا من العزف على الطبلة ووقفت زوجته ريهام لتشجيعه، وعلقت قائلة: اتجوزت جوزى عشان كان بيطبلى في الأول وخلاص بقي بعدما اتجوزنا لأن الطبلة دي عملت مشاكل كتير، وكان لما بيطبل بلاقي حواليه 20 بنت فخليته يبطلها خالص.

وتحدثت ريهام عن نجاح عملها الأخير "ربع قيراط" قائلة: أنا بحب حكاية ربع قيراط من مسلسل إلا أنا، والنكد تمثيله أسهل بكثير من الكوميدي، لكن طبعا في صعوبة برده والناس بتحبه جدا".

وأضافت ريهام عبد الغفور: كنت برقص باليه وأنا صغيرة لفترة قصيرة، ومكملتش بسبب إن أخويا كان مصاحب المدربة بتاعتى ولما سابوا بعض مبقاش يودينى تانى.

وتابعت ريهام عبد الغفور: والدي عمره ما كلم حد ليا عشان أمثل، أنا روحت أوديشن من غير أهلي ما يعرفوا لأنهم مكنوش عاوزنى أشتغل قبل ما أخلص دراستي وآخد البكالوريوس الأول، فاضطريت أروح من وراهم.

وأكدت ريهام عبد الغفور أن زميلتها حنان مطاوع من أقرب نجمات الوسط الفني إليها وقالت: أقرب حد ليا في الوسط الفني حنان مطاوع بس هي مثقفة عليا شويتين، وروحنا مع بعض قبل كدة في مهرجان كان وشوفت براد بيت ومعاه أنجلينا جولي، وكانت حامل وهو ماشي وراها بالشمسية.

ريهام عبد الغفور: والدتي اسمها شمعة

وأضافت ريهام عبد الغفور: والدتي اسمها شمعة وبيتقال عليها كدة عشان من صغرها كانت بيضة وحلوة ومنورة، بس هي اسمها الأصلي فاطمة بس مش بنقوله".

وطلبت الأبلة فاهيتا من الفنانة ريهام عبد الغفور الاتصال بوالدتها لخلق مقلب بأنها اكتشفت خيانة زوجها وقررت الانفصال والطلاق، الأمر الذي تسبب في تعنيف والدتها لها في المكالمة ببعض الكلمات.

وأكدت ريهام عبد الغفور أن والدتها تحب زوجها جدا رغم انها لم تكن موافقة على زوجها في البداية، وده بسبب أن زوجي اتعرفت عليه في حفلة كان بيلعب طبلة كهواية، والناس قالوا ريهام عبد الغفور مرتبطة بطبال، فهي لطمت وقالها كمان طبال.