چنت اظنك منتظرني
كالصمت أصبحت كأني لا أرى
و كالهواء لا يغطيني الثرى
تسكنني الحياة و الموت معاً
لا ادري ما يجري لأدري ما جرى ...
كالماء ما يمسكني من احدٍ
إلا ومن كفيه صرت أقطرا
و ما عزائي إلا أن أقول لي ..
يا حظي بالقادم حظاً أوفرا
**
چنت اظنك منتظرني
وسفه تاليها لگيتك حيل تفرح
من تضرني
چنت اظن گلبك مثل گلبي يحن
چنت اظن....
و يا ريت أبد ما چنت اظن...
صدك كل هالمده ذوقك
معتبر بچيي لحن
ليش كل هالمده ذوقك
معتبر بچيي لحن
يا فشلتي گبال عيني
فشلة النكته الفطيره
التنحجي گبال الرزن
عنست...
عنست بغصنك وردتي
و يا غربتي
الغصن محسوب للورده سجن
٭"٭
بعطشهم فضت روحي ما يهلها
الغيمه النهر عدها ماي اهلها
العليه يعز دمعته ما يهلها
بعد ما موت لا يبچي عليه
بلا چفي ظل محد يشوفك غالي
چنك سراب بليل فنه يلالي
و أنه السهر ينخل الليل بغربيل
الظلمه طاحت و النجم ظلالي
شما تعله يبقه الأعله منك موجود
لا للمسافه الحبني يتدنالي..
الثمل يرفع هامته يبدي الكاس
المفشل السكران راسه العالي
روح بشرط كون بوكت محتاجيك
اقنعهم جذب فد يوم مثلك ينجاب
بروحتها چي ظلمه الشمس گلنه تغيب
بس ما سمعنه عله الگمر گالو غاب
انطفه سمعي
و حرت دگتك بيا باب
تجي بتموز تهجرني بيا باب
انا بيت انهدم باقي بيا باب
ميت وگفه خاف تمر عليه...
لا تأمن لليگلك يا هواي
ألمن تغيب اتوسل الله
و بالكلام يخجلك
روح رمشة عين و ردله
و شوف ريته توشلك
و شحلاته الگمر لكن
ماكو بي أي جاذبيه
يرجعك كل ما رحت
عيش گاع تظل كريم شما عشت
الگاع تسحگهه و تحضنك لو متت
كسر عيش بخاطر المنهم فتت
طر ندمهم خل يحسبونك وكت
صير ممنوع و حرام غير جائز
وأنتبه لعيون ناسك وي هلك
كلها غضت نظر عنك
بس اليحبك حللك
فجر صير و لا تبين اله لليسهر الك
الطاير و گلالك اصعد
گله عفواً
طيحلي أنته ... جاذبيتي تنزلك
النبي گضه العمر جوه
و چان ينزله الملك
عيش لو سكته بمزاجك
لا تمر صوت و حلگهم
عالمزاج يفصلك...
ساعة الفرحه لسنهم كلهه تبقه تهلهلك!!
و ساعة يقروك بعزاهم كلشي ترهم ...
يا رخيص شمسهلك
ابقه وحدك
كلشي يبقه لوحده ينعز
صدگ يسمعون نيتك
لو وحيد أنته الهلك
أبقه وحدك
لا تظن كل ملگه طولك ينشبك
الحيف ناتج ملگه چف
يلاگي چف و ينصفگ
ابقه وحدك
لم هدوئك ... افترك
الباب ما يندگ اذا ما ينطبگ...
ابقه وحدك
رمم جروحك بروحك
سوي من حزنك مظله
الموت مو يوميه جرعه
مره وحده و جرعه كله.
السمه مرايه جبيره...
و البرق خط فطر بيهه
شما بچت گطره لنهرهه
رعيدهه يصيح عليهه...
كبرياء البحر ملحه
و النهر من مايه يخبط
قصده ما ينشاف جرحه...
و هذا طبعي
الغيمه ما حبنهه گطنه
الغيمه ام الخير ملحه...
أقره نيتي
تهجه لو من گلبي صفحه
الظرف تابوت الرساله
البيهه من يقرونه يصحه
لا تراويهم سمارك
الغيم من يكشف سماره
السمه تطيحه
يالعفت لچمات بيه
بگد عدد بصمات ناس بجامع
و بس أنه سبحه
لا تظن روحك نبيهه
الترافه احكام بيهه
الورده كلمة شكراً من الگاع
لعيون السمه المطرت عليهه
وروحك شگد گطعت شكراً بديهه
و چنت اگلك
خل نصير طيور ملگه
نمد جسر قوس و قزح بين الغيوم
و چنت اگلك حبني دوم.
حبني مثل اسمي
و لا فارگني يوم.
و ياما گتلك...
روحي من تحرگهه خلهه
شوكت متحب هيه تبرد
الحديد اليطفه رسن روحه تجمد
روحي لبست چفن اسود
و أنته من گد ما لمعت
الناس شكت بيك مرقد
بگد فرح تابوت فارغ حزني و أزيد
و حزنك بگد درهم بچفين حاتم
و أنته قيس يطول شگد
بعز برد الله نسماتك چوناي
يچوي الناي بس وني چوه الناي
اذا ونك حرب خايب چا وناي
احس هولاكو طب بغداد بيه
مثل ناعور بس كله علاه ماي
غرگت و أمي ما وچدت علا ماي
حته يحبني گلي امشي على ماي
بشرط... گطرة بلل متلوح بيه
م
رد مع اقتباس
