عزة نفس
لا يگلبي شبيك حزنان وعليل
تعاتب الدنيه بقهر تشچيلها
گوم انهض وانفض شلم الشليل
والتغثك هز چتف غنيلها
دنيه ويه الخان صارت واليعيل
شبيك تحرگ روحك وتحچيلها
خلها تبرد بيك ويطول الجحيل
افرك چفوفك غصب دفيلها
لو غدر وياك صاحب لو خليل
مدها ايدك من يمر اوشيلها
ومن تشوف الناس ترفس بالدليل
خلّك بطيبة گلب واعفيلها
لا تعاتب ليلك ودمعك يسيل
الدنيه من تظلم گمر يضويلها
لا تظل إبالك حچاية جليل
حچاية العاقل أهم تحليلها
ومن تطيح رويحتك يوم وتميل
انت وحدك بالصبر تچيلها
شكثر خيل التركض وتسمع صهيل
وما يهمها الصار حد ذويلها
شدها روحك خلّك بحچيك ثجيل
وابقه ثابت لايجرفك سيلها
عزها نفسك دوم خل خلگك طويل
والتچلّب بيك ضحكه تزيلها
توفيق الصكبان..
رد مع اقتباس
المشاركة الأصلية كتبت بواسطة Haidar Iraq
