اكو واحد اسمى قدوري
جان قدوري عطال بطال
ولن طاگ طگة للستار وصار يدخل مزايدات باسمه واصدقائه من الاغنياء والناس تسميه عبد القادر ، المهم من طكت اموره شال من القرية واشترى بيت دبل ڤاليوم بالولاية وتكبر على گرايبه ، واحد منهم اسمه ابو جبار چان زلمة معدّل بالحچي اجوه فد يوم وگالوله قدوري اشترى بيت ونريد نروحله بس محتارين شناخذله هدية ويانة لأن شايل خشمه علينة ويشوف نفسه مستوى عالي ؟!
فرد عليهم وگاللهم : خلوا الهدية وراي حتى يعرف قدوري قدر نفسه ...!!
المهم التموا الربع وطگوا عگلهم وراح وياهم ابو جبار شايل بيده كارتون چبير ومغلف بورق ملون وحلو ومن طبوا للبيت تلگاهم قدوري بالگلبية مالت النوم ويتنفخ تنفخ ويحچي بالمثاقيل وبدل ما يطببهم لغرفة الاستقبال گعّدهم بالحديقة على كراسي بلاستك ، ابو جبار شال الهدية وخلاهة على الميز البلاستك وورة ما شربوا العصير ورجعوا بالطريق سألوه : حجي شو ما شوفتنة الهدية عاد تليق باستاذ قدوري ؟؟ گاللهم : اذا يفتهم انتظروه راح يعزمكم ويراضيكم !!
صدگ ورة اسبوع افتر عليهم وواحد الواحد وعزمهم على غدة محترم وتلگاهم لابس عگاله وشماغه وگاملهم بواجب الضيافة على اكمل وجه !! الربع من شافوا حاله تغير باوعوا لابو جبار وگالوله : حجي بروح ابوك شنو هاي الهدية الثمينة الخلت قدوري ينگلب علبطانة ويصير انعم من الدخن !!؟؟
رد عليهم وگاللهم : الهدية چانت بريج نايلون ابو الف دينار ...... !!!!
رباط سالفتنة !!
من ننطي كل واحد قيمته ونبتعد عن الفخفخة والمجاملات راح يصير المسؤول انعم من حبة الدخن ، ترة وداعتكم ياجماعة الخير اكو ناس الوادم تصيحلهم استاذ وهمة ما يسوون حتى البريج !!
تحياتي للطيبين...
رد مع اقتباس
