دوريتك
وانته بيه مثل جفن العين واگرب
چنت احسنك واشوفك
مالگيتك
طشرت بعيوني صبحك
مالگيتك
دوريتك وانته بيه تعيش سالوفة مسودن
والمسودن لا أبد ماينسه سالفته ويحن
دوريتك
دوريتك
دوريتك
بواهس المحترگ گلبه
وسكتته كلش وسيعة چنها عينك
وانته يلعينك وكاحة روج من تگبل سفن
مالگيتك
وطارش من الله يگلي
ما يجون
شلون گلي مايجون
وانته تدري الصفنه بعيوني نهيبة
اي نهيبة
وهدر دم
ودلال مچفيه
ومضيف بلا رحم
وغيض سمرة
مفرعة بلايا گصيبة
شرد اگلك
شرد اگلك
ياطويرش شرد اگلك
القهر مايعتني الناكر حليبه
القهر مايعتني البطران و العنده حبيبة
وانه بعيني الليل يغفى صياح ناس
مچودرة بعشوش عگلي
وحيل نيتهم غريبة
وبعين كل الناس
يغفى الليل صبحية عرس
وافراحهم طشت هلاهل
والضحك سعره بفلس
وصفى مشابگهم رهز وبلايا حس
ناموا او فاض الدبس
والضحك صاعد ل الله عدهم
وانه متنطر شمس
اي شمس
لو حتى ظلمة وباهته وكلش قديمة
وبيها من حزن الأمس
مالگيتك
مالگيتك
لك مديت الشوارع هلا لجدمك
بلچي اشوفك
بلچي تضحكلي الدرابين الحزينة
المنها ما ظنك تجيني
حتى لو تضحك عليه
قابل بشوفك
يلبشوفك
كل عرج بيه من الفرح ينفض ترابه
وتنمحي اهمومي او ونيني
وتشمر الدنيا مفاتيح الفرج
وتگلي فك بابك
واشوفنك تجيني
ويمتلي بطولك حنيني
ردلي خل تزهر محطاتي
النسيت العمر بيها
واحلى ايامي واسنيني
ردلي
ردلي لاتشمتني ناس بيه بلا ضمير
ردلي لوغربة بوطن
هم راضي اصير
ردلي
ردلي
وانته ماتدري يخايب من تردلي
يرّد كل شوف العموا بجفاك
ويطش الفرح بشفايف الخرسان حس
ردلي يانسمة هوى طولك اليحيي الماتوا من ازمان
والضايع ذچرهم لوگلت بس مره بس
ولا ولا تدري عناگيد العنب يستحن
لو يختاض نهدك
والحچي ماينحچي وخليها سكته
مشابگ السكته همس
يا بعد كرخ ورصافة
يا حضن دجلة الخير
ماردت وياك كلشي
بس سگف يسترنه ومتيرة حصير
مالگيتك
مالگيتك
ودورت روحي انشدتها
هاا يجون ؟
گالت انسه وعاندتها
لا يجون
لا يجون
وبيدي خميت الوجوه وماحظيتك
مالگيتك
بس حزن
كلش احنين جاي منك
صحته واگعدنه وسوالفنه بدت
والقهر متربع بنص الحچي
وگمرة ايامي طفت
والظلمة تنشدني
شوفه ماجايب صبح
وتگربت منه
وسألته
يا حزن
ياااااااحزن
ماشفته وحچالك
عني عن الايام
عن ذيچ الليالي الضيعتهن انتظر ؟
گلي وداني الك
گتله انته !!
گال انه كلي الك
دنگيت
لنه شابگني الحزن
يبچي عليه
وگابليته
وللصبح ضلينه
نتباچى سوية
وفزز بروحي منية
والتوابيت اعتنت
والروح شاطت ل لله بيه وعطبت
بس ما متت
لا مامتت
باقي انتظر






م