بكثر مامنعوني اصيرلّك حبيبه
تشتهيني عيونهم دمعة غريبه
واشتهيهم ليل متدثّر بأغاني
وظرف تنشم مكاتيبه
يمته ماانبِت گمر بالماي، گطعوني لعطشهم
ووين ماعدهم عمر ضايع شبابه
براحتي يمشطون شيبه
هلي المافهموني هاعزهم بروحي
بكثر مامنعوني اصيرلّك حبيبه
بكثر مادوم انت تهواني اعله بُعدي
الگاع تچويها الشمس چي مو قريبه
بكثر ما يوميه يقروني بمحطه
خاف لا ازهگ واكتبك
هلي السحگو هيل عمري بدرب حنظل
حيل احبنهم واحبك
هلي الضمّو عنك سنيني بحرگهم
مادرو كل نار، گلبك
وآنه كاغد
حلمي اصير رماد بچفوف الأريده
وهذا گلبي
شما يحبسه الليل غربه
الصبح يركض وطن مدري لياجريده
ومدري چم مدري الجزتني ومادريت
بيا هوى الگه النسمه نسمه ؟
بيا مسيّه الماي اصدگه
من اشوف دموعه بيده
بيا طواري امن الحرب تشبهني گاع
حتى اعيشلّك شهيده
اليمته اموتلّك حلم ؟
امس حاچاني الضوه الشارد من سنين النجم
گالّي اعله الليل چذب التايهين
وكلشي بي ماينلزم
والشمس تنزِف عمرها غروب چي فيها بضوه اسود ينلچم
شلون اصدگ الناس وآنه سنيني چذبه ؟
بموته باچر تنثلم
ويضيع ذِكري
يا گبر يشهگني باچر للهوى امن ايخنگه عمري ؟
آنه زتيت السهر للماله عين
وگذّلت لونه اويه شَعري
وانه گدت الصوت للضايع صداها
وعلمتها شلون بالماتدري، تدري
وآنه وصيتك عليّه تشيلني من اسمي امن اطيح
تدگني ع البيبان لو شفت الوكت ناداك ريح
ووين ماسكتت غناويّك حبيبي
خوف لليهواك صيح.
ايما صباح
رد مع اقتباس