شعر شعبي عراقي عن الشهيد ابو مهدي المهندس
أهن دربين وختاريت درب الدم
صحنه تموت كلت النه اليطخ ينذم
اليختل بالحرب يسلم من الجيلات
لكن من حجي التاريخ ما يسلم
اليطب للحرب يعرى حسين ضل عريان
واحنه من الحسين دروس نتعلم
يلتعريت سيف من اجل كبة حسين
السيف شما عرى يضل صاحبه مهندم
ما ضميت روحك من على الدخان
الزلم تنكط صفار وانته تتبسم
يبو صكير الزلم جدامك من الخوف
لبدو مثل شعر بلحية ملثم
المهندس من رفع خشمه فزعت شمسين
وضواك بكل شراسه وعافيه تحزم
يبو جف السطرهم لحد ما باسوه
فلح من لزم تفكه ومن غزه تغنم
صلف وترهدنت جويه اعلى جفن العال
تلجمه شما رمش وتندهه لو سلهم
اعلى حد الكابلك ماشاف غير الكاع
كضاهه مدنك وبلوكفه ضل يحلم
تخمت بطنه بزلم من فتح حلكه الثار
لما حومر عوافي وصاحلك تسلم
شكثر صاحو تحذر لا ترد مجروح
كلت سيف اليعارج يرجع مثلم
الكلف يتخوصر بطرف الشيل چلاب
ومن تنخاه كصيبه يفرع ويهتم
سيف الزين ما يلتفت للزنجار
شما طاح النده وجو الحرب غيم
يبو كارة العز الما رخلهه حزام
شلتهه ومنهه خصمك عود ما چيم
غسلت كاعك بدمك من سحكهه العار
لما جسمك بملح ترابهه تيمم
على متونك رتب شايل تراب الكاع
وصدرك بلرصاص الماذر توسم
يراكض صوب خصمك ركض شيعناك
وشكو حايط فرح برواحنه تهدم
اول مره ما تلتفت من نصيح
يلتفزع هلا شما صاحبك حشم
ميت وما ردت واحد يزود عليك
شما نركض وراك النعش يتقدم
بعدنه شما يمر اسمك نطيح دموع
وكلما ينذكر طاريك نتشيم
وبعدنه بصورتك نعرض بكل ميدان
ويربطلك شما مهوال يتكلم
وبعدنه نذكر شما تمر شده وضيج
ونتخيلك واكف حافي ومحزم
متت بس عاش جرحك بلكلوب البيض
مثل فراش خير ما قبل يلتم
مصطفى حرب
رد مع اقتباس
