رسالة عتب:
من أم...الى ابنها الوحيد
الذي لم يسقط شهيداً في ارض المعركه.....لكنه سقط من عينها
بعد ان فضل زوجته عليها.....فكتبت له هذه الكلمات بطرف العكاز
ثكل وجهك...على الثكلت بطنها وياك......وشلت جفك على الشالتك بتسعه
جنت منتضره ترفع راسي بين الناس...........موش كبال مرتك صوتك ترفعه
وتهز ايدك على الهزتلك الكاروك........يبني رباك ...طيح متني ,والدمعه
وأذكر لون الكماط من اشوف الشيب.....وكماطك نزعته......الشيب شينزعه؟؟
بيه جروح وسعه...خياطهن عمرين.....وأعذرك ملتهي بعيونها الوسعه
كلامك بي جمر يحركني طول الليل.......لا تشعلني امك انه مو شمعه
اجيبه منين؟؟ذاك ال بأمك موصيك.....ابوك ال بالكبر من لحده شيطلعه؟؟
مثل وجهك وياي...السمع صار ثكيل....وحجيك بي ثكل لجتافي ماارفعه
جنت تلبس جديد وصبري كله فتوك...واكول ابني بكبرتي يشيلني بضلعه
كبرت هسه وكمت ما تلبس القمصان....كمت تلبسني هسه وصوتي متسمعه
غريبه الضحكه فوك شفايفي من سنين..........فنك تلكه هلهوله بحلك فدعه
من اسولف قصتي لازم تسكت الخنساء...وأحير الفاجدات بصوتي من انعه
انه المات ابنها بعينها,,ومامات........................ .اندفن مو بالكبر بعيونها تشيعه
حط بعيني صبعه,,وأول امس حطيت.........ذهب عرسي,وحلالي ,وحنته بصبعه
ترى اليزرع حطب محصوله بس دخان.......وتهب ريح بحصاده ومايكض زرعه
ودللولي الها حوبه وماتطيح بكاع.......مثل دعوة امام بليلة الجمعه
وأذا تفتح كبر المأذي امه تشوف...الجفن اسود عليه صاير مثل طبعه
رد مع اقتباس
المشاركة الأصلية كتبت بواسطة طائر الحب
