حاير شرد اگلّك من تگلّي اشبيك
خايف من اگلّك خوف تحسبها
ماذبها عزيزه چلمة الأحّاه
ابحظن امّي وگولن عيب ماذبها
انا فعلا غريب ابّين هاي الناس
لغتهم موبسيطه اوصعب احچيها
ونا طبعي صبح ما احب ضحك الليل
وحب اليسحگ اجروحي اويأذّيها
طبع الگاع انا متعلّم الطبرات
وضحك لو شفت فزعة مساحيها
شفت مرّه حمامه اتحوم فوگ الدار
گلت ياربّي سترك غاد ودّيها
مو كرها ولاكن مستحه امن الطير
ماعندي أكل من تحط شنطيها
انا ضحكة نبي او دمعة ملك جبّار
نادر ماكو مثلي ابزودي احچيها
انا طبعي ذهب كشخه او ذخر للعوز
حتّى الماتلوگ اتلوگ اخلّيها
ماريد اليشب النار سهله النار
بس جيب الشجاع اللّي يطفّيها
من الله خلقني ما احب الفاس
الفخر مولليهدّم لّلي يبنيها
ماحب النخل لو ما يلوح الغيم
ماريد الطخيخ العلو العاليها
نعم محني الظهر بس مو كبر ويّاي
لأن اگصار يمّي اوگلت اماشيها
ماحب الرخص والغالي للغالين
ولا انفس الحاجه ابأيد شاريها
انا لوح السدر ووّل مهد الماي
البزايز لمّن اشبع عود ارويها
انا طبع النمر آكل جديد الصيد
والماكول منها الغيري اخلّيها
السكته ابمستحه مثل الشريفه ابليل
بس ابن الحرام اليجسر اعليها
ونا طبعي خجول او خلگي طاسة ماي
ليش اتريدني ازعل وبدّيها
تعلمت المكابر من اخت عباس
ماناحت ابد والشمر يحديها
رد مع اقتباس
