ريهام سعيد تدافع عن نفسها بعد اتهامها "بانعدام الرحمة"
قدمت ريهام سعيد اعتذارا مطولا لكل متابعيها الغاضبين من حلقتها الأخيرة ببرنامج "صبايا الخير" بعدما نشرت مغامرة عن اصطياد وتعذيب ثعلب صغير، مؤكدة إنها نشأت في بيت مليء بالحيوانات ولا يمكن أن تتعمد إيذاء المخلوقات، ولكن الهدف من الحلقة كان الكشف عن مهنة موجودة وإخضاعها للضوابط والشروط، وألمحت لوجود مؤامرة من إعلاميات و"ممثلات" غاضبات من عودتها مجددا لتقديم برنامجها بعد انقطاع دام عام ونصف.ريهام سعيد، قامت ببث مباشر عبر حسابها الشخصي على موقع الفيس بوك بعد حذف قناة النهار للحلقة استجابة لضغوط جمعيات الرفق بالحيوان، وقالت سعيد: أنا تربيت فى منزل طول عمره فيه حيوانات، وكان عندى سنجاب وقنفذ ونسر، وطلعت الصور بتاعت ابنى إمبارح اللى ماسك فيها الحيوانات"، مؤكدة أن فكرة تجارتها بالحيوانات وأنها إنسانة بلا رحمة غير حقيقية خاصة من الأشخاص المقربين منها والذين يعرفون مدى علاقتها وحبها للحيوانات.
ريهام سعيد تعتذر من مشاهديها على فظاعة المشهد
واعتذرت ريهام سعيد، لكل من غضب من عرض مشاهد اصطياد الثعلب وتعذيبه مؤكدة إنها غير مسئولة عن تحديد طريقة الصيد وأضافت: إحنا قلنا عايزين نركز على مهنة صيد الحيوانات وأنا مخلتش الراجل يصطاد الحيوانات بالطريقة الصعبة دى عشان أصور، وأنا رايحة أصور رحلة صيد ذئاب وثعالب فقط".
وتابعت: "نا معرفش احنا هنصطاد إيه، وأنا طالعة رحلة صيد زى أى حد ودى طريقتهم اللى بيصطادوا بيها، وأنا مليش دخل بيها، ومهنة الصيد موجودة لأغراض كثيرة منها علمية ومنها تجارية، وأنا وظيفتى تغطية رحلة الصيد وواضح من الحلقة وكلامى فى الآخر إنى مش مبسوطة من الطريقة اللى بيصطادوا بيها، وده ظهر فى تعبيرات وجهى خلال التصوير، مؤكدة على أن هذه الطريقة المرفوضة للصيد بالنسبة للجمهور ولها هى أيضا، إلا أنها لا تعرف الطريقة الصحيحة للصيد"، متابعة: "أنا معرفش طريقة الصيد الصح، وطبعا حق الناس تزعل، لكن متبقاش ريهام عملت حلقة لتعذيب الحيوانات عشان تكسب مشاهدة".
وعبرت ريهام سعيد، عن دهشتها من توجيه اللوم إليها وعدم التطرق للصياد، وقالت: محدش خالص جاب سيرة الصياد ولا طريقة الصيد وكله عليا أنا وأنا مالى، والصيادين بيصطادوا الثعالب والذئاب بهذه الطريقة من 50 سنة أبا عن جد، وأنا مليش علاقة بالصيد.
وتابعت قائلة: أنتم شفتوا طريقة الصيد غير مرضية بتعدمونى أنا ليه وأنا مخترعتش الطريقة دى، ولا قلت للصيادين يصطادوا، وأنا غطيت حاجة بتحصل بمنتهى الصدق وليه الصدق بيضايق؟ وأرجوا من الجمهور عدم تكرار الغلطة وبلاش كل مرة اتظلم واتاخد مع التيار.
وأضافت: فى ناس ضدى وناس مضايقة إنى طلعت البرنامج ده وناس مستأجرة عشان تتدخل جوه الحملة دى وتعمل هاشتاجات ضدى، والبرنامج بتاعى هادف وبيعالج ناس وبرنامج وطنى وشريف وبيقدم كل ما هو مفيد، والحلقة دى مفيدة جدا لو هتخلى كل الصيادين يغيروا طريقة الصيد يبقى أنا عملت خير كتير للحيوانات".
وفى نهاية حديثها قالت: أنا اعتذر عن المشاهد السيئة لصيد الحيوانات ولكن فى شغل ممنهج ضدى، وأنا موقوفة بقالى سنة ونص ولسه راجعة البرنامج وعايزة اقدم حاجة كويسة وحاجة هادفة وبنقدم فرح وبحاول أرضى الذوق العام للمشاهد.
يذكر أن قناة النهار بادرت بحذف الحلقة الثالثة والأخيرة من برنامجها "صبايا الخير" بعدما خاضت في كشف كواليس صيد الحيوانات في مصر، وأصدرت القناة بيانا عاجلا قدمت فيه اعتذارها من كل المشاهدين، وكشفت عن الهدف الحقيقي من وراء الحلقة.
قناة النهار مسحت كل مقاطع الحلقة الثالثة لبرنامج "صبايا الخير" من على موقع اليوتيوب ومواقع التواصل الاجتماعي، وأصدرت بيانا عاجلا للإعتذار من مشاهديها قالت فيه: النهار تعتذر عن حلقة صيد الحيوانات وتعلن رفعها من جميع منصاتها.
وتعلن "شبكة قنوات النهار" اعتذارها للمشاهدين، عن حلقة أمس من برنامج "صبايا الخير"، والتي كان هدفها فقط هو تسليط الضوء على نشاط صيد الحيوانات في مصر، وتصديرها للخارج.
وتؤكد "شبكة قنوات النهار" أن الحلقة تم رفعها من على جميع المنصات التابعة للشبكة بما فيها يوتيوب وسوشيال ميديا.
وتشير الشبكة إلى أنها تأخذ بعين الاعتبار وتدعم حقوق الحيوانات لما لها من قيمة متأصلة في الحياة، أبرزها العيش دون قسوة ومعاناة، وحرصها كذلك على الدعوة لاتخاذ أي تدابير احترازية مرتبطة بحقوق الحيوانات، بهدف حمايتها وعدم ترويعها.
وكانت الشبكة قد تابعت باهتمام بالغ، ما نقله رواد مواقع التواصل الاجتماعي، خلال الساعات الماضية، وتقدر غضبهم على عرض مشهد الصيد.
رد مع اقتباس
