المشاركة الأصلية كتبت بواسطة أبن ألأشتر
كنت في صغري وبداية شبابي العب رياضة .
ولما تورطت بالمسؤولية طبعا .بطلت .
عاد طلعت عليه نتائج اللعب والجهد البنّاء.
فصارت عندي تشنجات موطبيعية ونحول وبهوت وكل اللي يؤدي للضعف
العضلي والاعصاب وحتى العظام .
رحت اشتكي للدكتور . طبعا بالخارج .......؟ هذا يختلف عن الداخل صح .
قال لي الدكتور .
اذا تبقى على هل الحال .يعني ماترجع اتمارس رياضة ولو ع الخفيف (ركض وهرولة)
فدوائك (آي ببروفين).
واذا رجعت للرياضة اتركه .
انا اخذت العلاج .وبعدها بفترة رجعت للعراق .
لما رجعت . فكرت بنفسي انه ليش مالعب رياضة وهي ركضة ربع ساعة كافي .
هنا المصيبة ياخوية ياسوزان .
انا جاي من كندا ومشتري .تراك سود منهم ومريت على هولندا واشتريت تشيرت برتقالي .
ففي يوم فكرت اطلع من الصبح واركض .
منطقتنا كلها حجاج وخيرين اطال الله في اعمارهم ورحم الله موتاهم .
الصراحة .
استحيت .يعني البس اتراك اسود وفيه خط ابيض عريض من الصفحة وتشيرت برتقالي
واركض من الصبح ويلاكّيني ابومطشر وابوعلي وابومهدي
وانا اركض شنو مسودن . واشلون اسلم عليهم وانا اركض ع السريع لو اتوقف .
ماتمشي السالفة .؟
فأجت في بالي فكره .
كلت خليني البس دشداشة واخذ ملابس الرياضة ابعلاكَة .واروح (للجول )
وهناك اغيّر ملابسي واركض على كَد مااشبع .
.........
ارتاحيت الى هاي الفكرة وعملت بها .
أذن الصبح وأديت الصلاة والحمد لله .وطبعا شربت الجاي .وطلع اخوج ..اهلنا يسموها
(وي طكّت البريج) يعني من الصبح .؟
بعدهي نجمة الصبح ماامسلمة . كانت الدنيا شوية باردة .فكنت لابس سترة .
المهم غيرت ملابسي . ولبست الرياضية .وانا وحدي بشبه الصحراء (بالجول)
فحطّيت صخرة على دشداشتي وسترتي .
وتوكلت على الله .
انا الظاهر فاقد اهواية من مهارتي العمر وترك الرياضة طبعا افقد .؟
فبديت اول مرة شبه المشي تقريبا (يعني مابيّه حيل )
اشوية وحميت .
يعني مسافة ربع كيليو .
وانا زدت بالسرعة .
الظاهر اكو مجموعة من الكلاب حاشاك وانا ماماخذ بالي .
عدهم وحده جايبه وملتمات عليها .ونايمات وعادة الكلب يسهر بالليل وينام الصبح .
لما زدت بالسرعة يافرحة مامثلج فرحة ........ للكلاب طبعاً.
شافن واحد من جوه مثل الحمار الوحشي اسود ومخطط بالابيض ومن فوك برتقالي
كأنه ببغاء افريقي .
وهن ياروح مابعدج روح .
طبعا هجمة وحده ونبحه وركضة وحده .والمشكلة انا اعتبار اركض من امامهن خايف وهاي فرحتهن .
ولما نبحن وهجمن انا التفت وانا اهرول .
الصراحة المنظر من خلفي لايسر ياسوزان ياخوية .
اعتقد بيهن ثلاثين جلب .
والخوف سوّاهن الف جلب .؟
طبعا اول مرة التفت بأستهانه بهن ولكن لما شفت ركضتهن وهجومهن وانا لاعندي اية سلاح .بس اتراك سودي .
اخوج انطاها اللهيب .
سبحان الله طلعت قوتي المخفية وصرت ابن اربعطش . يمكن في ذيج الساعة حتى لوفهد مايلحكني .
واركض واركض .مو من اجل الرياضة لا من المعنى الاخر اللي واحد يستحي يكوله . ؟
لاتكليلي ولاكلج اخوج ابدع .تعبت الكلاب وعادن خائبات وانا لازالت اركض .
عاد لما رجعن الكلاب وأطمأنيت .
تمددت هناك بالصحراء وحدي .اتكولين يربوع صحراوي .
ولما ردت ارجع الى اهلي .(كمّل تمريني وزيادة)
اشلون ارجع الى دشداشتي وسترتي وهن محاطات بنفس الكلاب . وانا وحدي (مكسّر ومكَطّع ومرمي بالصحراء)
مابيها مجال لازم ادخل المنطقة بهذا الشكل الغريب .؟
ولما دخلت ياسبحان الله الجريمة ماتنظم .
لكيت كل حجاج المنطقة كاعدين يشربون جاي .شاي ابراس الركن .
أحّو . يايايبه .
الصراحة بكل خجل وغصباً عليه .
سلمت وشربت جاي وياهم وانا مركّع اسود وابيض وبرتقالي .
ولما وصلت البيت .
ظلّيت ثلاث ايام مشنج ومنعول سلفه سلفاي .لوباقي على العلاج احسن الي . 
........
الملابس دزّيت عليهم صغار المنطقة جابولي الدشداشة .مشكّوكة .ماادري ليش
لأن كنت متشنج ومنسدح ويفرجون بيّه فماالي خلك اسالهم ليش
هاي قصتي مع التشنج
ربي لايرويها العبد مسلم
رد مع اقتباس
والهزيمة ثلثين المراجل ههههههه..ذكرتني بروحي اني هم عود رياضية وكذا واركض وماخذه الدنيا بحيل صدر هههه هالفترة صار التواء بالكاحل الايسر وبديت اكزل بمشي وره يومين هم بحركة خاطئة صار التواء بالكاحل الايمن هههههههه ..