مو ملحد
واحب الله واعرفه بيا كتر موجود..
واندلّه
مثل حْديثة تندل جرة الكحلة
ودرب گلبه سهل بالضحكة توصل له
ما عنده وجه مسدود....
ما عنده جهنم
لا يعذب ناس
ولا يحچي سوالف سود...
لليسهر غطا ونجمات
لليعطش نهر ممدود..
بي ريحة ندى البستان
وشايل طيبة المگرود...
ربي اللي ربيت وياه ورباني..
الضحكت بوجهه من شفت السما مناغاة..
واخذني من ايدي مدري لوين ودّاني...
هذا (الله) الحچيت وياه وحاچاني...
گلي: اضحك وحب الناس تلگاني...
گلي: بشوغة العشاگ تلگاني
گلي: بصفنة المظلوم تلگاني..
گلي: بشيلة اذا تشتاگ گلّبها
تشوف آثار ذرعاني...
واذا تكره غصن شجرة يا شوگ الروح
راح انساك واترجاك تنساني...
واذا تكرهني ما الومك
ولا اكرهك اذا حبيت رب ثاني..
كونك سالم ومرتاح
روح اتركني وآنه وياك
افك سماي وابقى لجيتك متاني..
تريد تصلي متصلي ولاجبرك..
ليش تخاف من عندي؟
يا صنع چفوفي ما اكسرك..
ولا اعذبك ولا اذلك ولا اهجرك...
تريد تعيش وحدك.. عيش
تريد تروح.. روح
تريد ترجع.. باقي منتظرك..
هذا الله العرفته بشوگ مال صغار
العرفته بخضرة الاشجار
العرفته بدمعة من احتار..
گبل لا تشوهه بعض الناس
ويخلوه يدور ثار..
ليش صار الله نتيجة؟؟
ورد فعل؟
مقسوم حصرا لليصلي..
وبين جنة وبين نار..
ليش شوهتوا الحنين
الجنة خيمة من الندى بصيف الفقير
يغطي كلمن گلبه حار...
الله بالدنيا انتصار
الله دار وگاع للما عنده دار..
الله مشروع اختيار..
آنه ضد كل المعابد
والجوامع
والكنائس
من تخلي الله تجارة...
آنه ضد الدين من يربط عظمة الله بمنارة
آنه ضد اول معلم
گلي اقره الفاتحة
وحصل بنية ونهر من طعم الخمر طوله حضارة..
آنه اعلن انسحابي
من التقاليد القديمة
من التقاليد الحديثة
من الوجوه الگالت الله يخوف وما تطفى ناره..
بيّ حسرة التشهگ الدنيا جگارة..
ومن وراكم..
صفنتي ولاية
ووجع گلبي قصيدة
وجرحي يوسع له مغارة..
وك مخنوگ..
احس الدنيا ما بيها سوالف شوگ..
احس الوكت مثل الثوب ظل مفتوگ
بديت اصفن واشك بالناس..
من شفت اليصلي يبوگ..
من شفت التزور چفوف ايديها حلوگ
من شفت الله من وجه الطفل مبيوگ
من شفت اليصوم يخاف من الماي
بس عيونه تشرب كل بنات السوگ..
-----------------------------------------------------------
الرائع الكبير
أدهم عادل
رد مع اقتباس
