انــا بـنــت ذلـك الـفـقـــيــر - الــبــارت الـتـاســع عــشــر
بارق : جمعت كل حيلي قوتي من شلت عيني بعينها
هيام : انصدمت هذا شلون وصل هناا
من باوع بعيوني راسا نزلت عيني احسهن يرين يطلعن من مكانهن من نزلتهن
استاذ يعرب : تفضلوا باشروا بعملكم
بارق : نزلت عيونها نزلت روحي وية عيونها رحت كعدت بمقعد الاتهام
استاذ يعرب : هيام فهمي المتهم بالقضية قبل لتبدون حتى يكون اكو توافق
هيام : بوجوده غابوا كل طلاب القاعة و هو گاعد گبالي ع المقعد رهبتي من الطلاب و الرجفه اختفت رحت عليه
صارت رهبتي كلها منه بكل خطوة تجاهه گلبي يدگ كمت احس گلبي سريع حطيت الملف كدامه و هو اتصفحه
بارق : اباوع عليها من وصلت دنگت راسي لان هيج قرب بيني و بينها اذا شلت عيني عليها انشل .. اتصفحت الملف
( بهمس) من هذا الكرسي و بتاريخ ٢٠٠٢/١/١٣
اعلن استشهاد بارق محمد مجيد
هيام : نعم
بارق : رفعت راسي عليها
القضية سرقة
هيام : اي
بارق بهدوء : اكو مجرم يتهم شهيدهُ بالسرقه ..؟؟!
هيام : رفع عينه و بسرعه نزلت عيني .. ماريد لازم ابتعد من حجى رفعت عيني بوجهه باوعتله باستغراب
بارق : عقدت حواجبها ابتسمت و دنگت راسي
فهمت القضية استاذ
استاذ يعرب : اذن ابدوا
هيام : اترافعت بصفتي مدافع عن سارق بريء سرق حليب لابنه الرضيع من محل هواي ناقشوني و وگف ضده و اعتبروا سارق يستحق العقوبة و اكو ايدو دفوعاتي صفن الاستاذ قدمت اخر ماعندي
لو كان السارق نيته فساد عام كان سرق صندوق الاموال او اي شي اخر بالمحل غير الحليب بس للضرورة احكام حياة الطفل فوق القانون اذا ماحدث ضرر عام
صار سكون بالقاعة و الاستاذ صافن علية احس جنت اقاتل لان اغلبيتهم ضدي بالحكم بقيت ساكنه و اباوع ع الاستاذ رفع ايده و صفگ
استاذ : ادهشتيني هيام و هذا المتوقع منج انتي مشروع قاضية ناجح مو بس محامية
هيام : ردت روحي وجهي ملته الابتسامه حسيته انجاز عظيم رحت اخذت الملف من گدام بارق يمكن حتى مشفته هلگد ما الفرحة وسعتني رجعت كعدت
سمر : عفيةة بيج من يمي طرت بدعتي
هيام : الحمدلله اشكد جنت شايله هم
بقى الاستاذ يشرح انطانا تحضير و طلع احس الوجوه مكهربه
سمر : امشي نحتفل بيج بلفات فلافل
هيام : يلاااا
طلعنا جبنا اللفات و الببسي من الكافتيريا و رجعنا گعدنا يم صفصافتنا
سمر : ولج يا ظالمة النفس
هيام : ليش
سمر : بارق يا عديمة الاحساس بارق
هيام : شبي
سمر : بشحمة و لحمة اتطوعلج الي ما بقت وحدة بالقاعه متقاتلت حتى تتطوعله
هيام : عمل انساني كسب اجر بية عادي
سمر : اعتقد الوردة الحمرة همين عمل انساني
هيام : خليت بطل الببسي ع المصطبه
لا مستحيل و ليش بارق
سمر : ليش مستحيل الي دعمج اليوم متعتقدين هو الي واساج هذاك اليوم
هيام : يمكن بس ليش؟ يگدر يغظ النظر عني حاله حال البقية
سمر : انطيني الملف
هيام : اخذت الملف مني و گامت تورق بي
شدورين؟
سمر : شفته يكتب مدري يشخطب من جنتي ملتهية تترافعين گدام يعرب
هيام : گولي والله
سمر : والله لج اني طول المرافعه عيني عليه و اربط بي و بالورده
اهاااا اقري هااج
هيام : اخذت الملف
ان يكون المقتول متهم في حضرت قاتله جريمة انسانية ★
گلبي كام يدك سريع باوعت ع سمر
اي هو نفس الخط و النجمة اي نفسها
سمر : و لا اجا ع بالي ابن الـ ..
هيام : الف فكرة براسي دارت
ليش زين ليش؟
سمر : واضحة مثل عين الشمس بارق رزن يختلف عنهم هيج خطوة يعني اكيد يحب
هيام : اكيد مو اني غلطانه ليش اني لا
سمر : و ليش مو انتي يعني اشو حلوة و حبابه و نقيه ماكو منج بالجامعه كلها
هيام : اورق بالملف بانفعال رفعت راسي عليها
و بنت فكر و هدومي مبهذله و شكلي مخربط ماشايلة جمال باقي البنات هنا اذا اني يعني بيها أن
سمر : أنتيش الولد شافج بعيونه مو بعيون الناس و بعدين الحب ميعرف فقير و غني و حلو لو مو حلو
هيام : لا هذاا اكيد ديستهزء بية حاله حالهم شافني بنت فگر گال سهلة يكلمتين توگع
سمر : و اذا يريد يلعب ليش اليوم جازف و دخل روحه بمشاكل الله اعلم شنو
هااا ابن العقيد ركن وگف ضد اولاد الذوات و فضل بنت الفگر عليهم
انتي شدتحجين شنو يجبره يگوم و يصف گدامهم كلهم
هيام : الدنيا ضاقت بيا اختنكت
ليش ميعوفوني بحالي مرايده لا دعم و لا اذية خلوني بالنص
هو مثلهم سمر هو منهم ديستهزء و يشفق
كافي مرايده شي بس اطلع من الجامعة بسلام
گمت من مكاني عفت كولشي بس بيدي الملف اروح اعلمه بمقام بنت الفكر اريد انفجر من القهر
سمر : جرت الملف و طفرت من يمي
ولجج تعاااي تخبلتي
گمت عليها جنطتي بحظني وگعت و اتطشر مكياجي
عزااا
بقيت الم بيهن ع السريع شيل و شمر بالجنطة
هيام : مادري بروحي بس امشي و العبرة خانكتني و دموعي تجري ليش ميشوفوني بشر عاد بشر مثل هالبشرية
بارق : اول مرة اسمع بصوتها اسمي هواي حبيته صار فترة اكابر بس من اشوفها ارجع لنفس النقطة احبها
و يوم عن يوم روحي تتعلق و اغرك بيها اكثر. گمت اشتاقلها حتى اذا گبال عيني
كل الي ابالي هي عيونها صوتها كولشي بيها ملكتني كلي
ميهموني الناس شيحجون احبها و لازم هي تعرف و لازم العالم كله يعرف و يرضى ميرضى العالم ميهم المهم هي حبيبتي
غزوان : دمي احترگ من الم راسي ردت اعيط بنص المحاضرة اراقب كل تصرفاته عينه مشالها عن هيام طول المرافعة بقيت ساكن حتى ورا ما خلصت اذا اتحرك ادفنه
هذا بشنو يفكر اباوع عليه واكف بالقاعة افكار توديني و تجيبني انجنيت بالكوة لازم روحي
عبدالله : و لا اتخيلت بارق ابن العقيد ركن ابن الاكابر واگع بحب هاي بربك مو سالفة تحير
غزوان : و هو بارق ما لگى غير البنيه الي اني احبها گمت من مكاني ادفع بالمقاعد
والله لاگلب الامة ع راسه
عبدالله : شنوو وين غزواااان يمعوود
غزوان : وصلت يمه واگف يم السبورة و صحت بي
بااااارق ...
بارق : درت عليه رأسا ضربني بوكسي قووي ع وجهي رجعت ليورا لان متوقعت الصار ركعت جسمي الدم ترس حلكي و خشمي
شلت راسي صارت هيام بوجهي
رد مع اقتباس
المشاركة الأصلية كتبت بواسطة راحل مع الايام
