سلسلة ما وراء الطبيعة
عبارة عن سلسلة روايات خيالية للكاتب المصري الراحل أحمد خالد توفيق تحجي عن الدكتور رفعت اسماعيل الي تصير وياه بحياته سلسلة من المواقف الي مو طبيعية ومالهة تفسير منطقي؛ سلسلة الروايات هاي بدت من عام ١٩٩٣ واخر عدد ظهر بيهة جان عام ٢٠١٤ وهو العدد رقم ٨٠؛ وطبعا هاي السلسلة هي الاشهر من مجموعة كتب وتراجم أحمد خالد توفيق والي هو من أشهر الكتاب المصريين (والعرب) عموما وانتاجاته كلش حلوة وغزيرة والحلو بهالكاتب انه هو مأثر بجيل كامل من الكتاب والادباء والمخرجين والممثلين المصريين الحاليين واغلبهم بادين بالقراءة وبحب القراءة ع رواياته لهذا يسموه العراب.... طبعا أحمد خالد توفيق توفاه الله قبل سنتين
واحد من الشباب الي من جان صغير كلش تأثر بسلسلة ماوراء الطبيعة هو عمرو سلامة؛ الي ميعرف منو عمرو سلامة فهذا حاليا واحد من ابرز وأهم وأفضل المخرجين المصريين...
هذا اول ما بدأ يخرج اخذ حقوق تحويل سلسلة ماوراء الطبيعة من الكاتب حته يحولهة لعمل تلفزيوني والكاتب جان عاجبه هالمخرج ومعجب بأعماله الي هنة جانن بعدهن كم عمل صغير ومجان المخرج هذا طاش ومعروف وكلة انو اني واثق بيك انت حتحول السلسلة لعمل تلفزيوني راقي بس المخرج عمرو سلامة تأخر ١١ سنة لحد ما سوة هالعمل لان جان ينتظر تتوفرلة امكانيات ممتازة تساعدة انو يسوي عمل يحترم عقل المشاهد بعمل راقي وابداعي اولا وحته يحفظ لهالسلسلة هيبتهة ثانيا...
وفعلا بتقدم السنين وتطور وسائل الانتاج وتطور موهبة وابداع عمرو سلامة نفسة؛ واخيرا تم صناعة مسلسل تلفزيوني بأسم ما وراء الطبيعة من اخراج العبقري عمرو سلامة بس للأسف الكاتب أحمد خالد توفيق حاليا ميت وملحك يشوف السلسلة من تحولت لعمل تلفزيوني...
المسلسل كلش حلو والمخرج كلش تعبان بي ونفذه بطريقة عبقرية؛ اضافة الى انه سوة فيكة حلوة بطاقم التمثيل انه هو مجاب نجوم غير بس البطولة لنجم واحد وباقي الممثلين ممعروفين أبد...
الممثل النجم هذا هو أحمد أمين... اول ما الناس المحبين للسلسلة عرفوا انو أحمد امين حيسوي شخصية البطل رفعت اسماعيل اغلبهم اعترضوا وكالوا هذا ممثل كوميدي شجابة عالدراما والغموض وحبس الانفاس بس احمد أمين فاجأ الكل وأدى الدور بطريقة عبقرية تفوق ع نفسه بيهة وأتوقع من هالدور حيصعد للعالمية (ماعرف ليش هيج داحس) يمكن لان المسلسل انعرض ع منصة نتفلكس العالمية و انعرض ب ١٩٢ دولة
العمل عيبه الوحيد هو الجرافيكس الي مجانوا متقنيهة زين بس كلشي عدا الجرافيكس جان ع اعلى مستوى...
الموسم الاول عبارة عن ٦ حلقات
أنصحكم تشوفوه
رد مع اقتباس