چذب ما عدنه ضمير
ونستلذ من نظلم ابنادم غريب
ناخذ المو النه گوّه
ونحچي بالقسمة و نصيب..!
نضحك اعله ارواحنه ،
لمّن نصلّي
واحنه شغلتنا نفرّق
بين محبوب وحبيب...!
ناكل بلحم البشر بس بالحلال
هذا واقع ! هاي چذبه وبيهه احنه
انچذّب اعله ارواحنا من نستغيب
ونفس ادينا التنرفع وكت الدعاء
گطعت ارزاق شكثر !
گطعت ارحام شكثر !
هاي كفره تنرفع ، وانگول بلكت يستجيب
اعيونّْنا العطشانه تغرگ بالملابس
من تمر هوسة بنات
ومن نروّي اعيونّنا...نذكر نگول
(احنه هم عدنه خوات...!)
يا أهل سبحة و عقيق و دمعة تنزل ،[نسئل الله مو رياء!]
*ترة الدين ايمان يبشر بالحياء
ترجمان الكل حلو بهاي الحياة*
ترة الدين احساس مو سبحة و صلاة
والدليل، الكعبة حيطان اربعة
بس تحس اهواي منها الله قريب
مرضى صرنة و مايصح النه طبيب
گامت الآمال تتناگط مَلل...!
و المصيبة احنه انعجبنا ابهالعلل
ماكو چاره...و ماكو حل
بس نمد ايد و نفک زیج الأمل
و من باب نتشافى ،نصيح أمّن يجيب...!
------
✍.د.أبوعلي النجفي
رد مع اقتباس
