انــا بـنــت ذلـك الـفـقـــيــر - الــبـارت الــثــالــث
تمر الايام و يبدي دوام هيام اول يوم
اول يوم الي بالجامعة طبيت برجلي اليمنى و دعيت اللهم اكفني شرها و قربلي خيرها اتعجبت من كبرها كانو داخلة عالم اول شي اجة ابالي اكيد اضيع بيها بقيت واكفه وين اروح؟ رحت سالت الموضفة
-السلام عليكم
-و عليكم السلام ، تفضلي
- لعفو اني مرحله اولى قانون وين صفي؟
تضحك : مبين مرحله اولى من كلمة صف اطلعي گبل على ايدج اليمنى يم الحدايق تلگين قاعاتكم
- شكرا
مشيت و احجي وية نفسي شلون فشلة بدايه موفقة الطريق كله اشجار يشرح النفس فرحانه و خايفة ، وصلت للقاعات اباوع للطلاب عبالك مو بالعراق لبسهم عطورهم اشكالهم تسريحات البنات
اعرف الجامعات الاهلية بس اولاد الذوات و الحزبيين يدخلوها
دخلت للقاعه كراسي گعدت ثاني سرا طرف بقيت اباوع على هدومهن ما شايفة منهن بالسوگ؟ ما اعتقد طابات سوگ هذني السوك هذني
ميمهم جايين ندرس ماعلينا لازم احدد اهداف اهم شي اصير اشطر وحده علمود المنحة و لازم اختار صديقة ماكدر ابقى وحدي بنصهم بس منو تقبل تصادقني منهن؟؟
بساطتها جانت واضحه للجميع هي مو من عالمهم
احمد -بارق شوف مبين عليها ضايعة بنص هالامة النرجسيه
بارق - مني؟
يضحك - ام الاسود و الابيض بعدها ع الزي المدرسي الافندية
- انت شعليك بالعالم احمد
- قابل شسويت الله اكبر
مياده - هلو
- هلا
- شلونك احمد اكيد عرفتني
- زين اي طبعا مو جنتوا يمنا اول بارحة على العشا
بارق يهمس باستهزاء - عشاء عمل
يتنحنح احمد
مياده - اي و امك گالت انت مقدم على القانون ، شلون صدفه حلوة ما عرفتنا على صاحبك؟
احمد - بارق ابن سيادة العقيد محمد
مياده : اهلا و سهلا والده غني عن التعريف تشرفنا
بارق - الي الشرف
هيام تجلس بوجه اصفر و عيون يروحن و يجن
حرت اگوم لو ابقى لو شسوي؟
سمر - مرحبا
رفعت راسي - مراحب
تگعد سمر - مبين عليج الخوف شبيج؟
- لا ليش؟ من شنو اخاف
- ممم المهم اني سمر و انتي؟
- هيام
- تشرفنا
- الي الشرف
تستند سمر على الكرسي و تاهذ نفس عميق
- شلون تشوفين الكلية
- حلوة
- الظاهر بس
- شلون يعني
- ناسها مخيفين هنا كلهم يحجون بالدينار و الدولار ، مادري ليش احسهم فارغين
- و شلون عرفتيهم؟
- ابوية مدرس و اغلبهم جانو طلاب عنده ، دائما يحجي بيهم و طبعا قرالي اسطوانه التحصين قبل لا اداوم هنا
- حقه يخاف عليج
- اي ، ابوج شنو شغله؟
- كاسب
- من هذا ارتاحيتلج من شفتج
- شلون
- تختلفين عنهم
- تقصدين مظهري
- لتاخذين كلامي من باب اساءة بس مظهرج انطاني انطباع على انو انتي مو منهم
- و يعني؟
- جنت حايرة اريد اختار صديقة بس دتشوفيهن ماعتقد اتوالم وياهن او الصراحة ماظن يقبلن يصادقني
عرفت تفكيرها مثل تفكيري - ممم يمكن
- اتمنى نكون صديقات
- عادي حبي اتشرف
رد مع اقتباس
المشاركة الأصلية كتبت بواسطة سيد الكلمات
