.....
انه ما اغتاظ واحسب لليعيل
ولا اسولف بالسلف عن غايتي
لا ادوّْر عن فصل يشفي الغليل
ولا ابيعن عفّتي بصرمايتي
انه خلگي بطول نخلاتي وطويل
والگطفني بحلگه احط رطبايتي
انه شايل مستحه بكبر الشليل
واترك الشايل حقد عد شارتي
هوايه ناس الرفست بنص الدليل
وعاندت روحي وكتمت حچايتي
انه فانوسي شعلاته الهم دليل
واليجيني فراش احطها عبايتي
انه بيرغ عشرتي يرفرف اصيل
يبقه غالي بگد غلاة ولايتي
التايهه الطگتني اعذرها وتشيل
وانفض تراب اليجيني بصايتي
التهمني ويطعن بغيبه ويهيل
حچيه فاهي ومايمس من قامتي
انه ماارجف لوّن مرني
الجحيل
بگلبي موگد وانه أدفي براحتي
من اشوف الطايحه عليه وتميل
ارفع ذراعي واردها بهامتي
انه سيف البخت عندي ومو قليل
لو ضعف والله يطگ من ثايتي
وانه اوَزْن سمعتي بطيب واچيل
واعذر العال واحطله وسادتي
انه ما اگص العثگ واجرح نخيل
ولا اگاطف وآكل من حجارتي
انه ماامد الشبچ وانطر واطيل
ولا اوسخ بالحرش دشداشتي
انه ادوّر العينه واحويها بزبيل
الهور هوري والأصيده بفالتي
وتبقى ريحة گهوتي اطيّب العليل
ورنة الفنجان تنهي طلابتي
توفيق الصكبان
رد مع اقتباس
