تعال وشوفني إشصاير بالإفراگ
ولا تِسأل عليّه إشبيك مابيك؟!!
تعال وشوف گلبي ونار الأشواگ
وِذا گلبك حَجَر صَدّگني أبَچّيك
.....
تعال وشوف غيض الروح بجفاك
مِثل غيض الرِگاب إعله السچاچين
أعَلّمها الصبر وتريد تنساك
يجيها الليل وترِد للسوادين
صِرِت كِلّي جَرِح تاليها وياك!
أَفِك گلبي وراويك النياشين
عليك إمن الجِدَم للراس مِشتاگ
كون إلسان عِد گلبي إويحاچيك
وَنْطُرلَك عُمُر وسنين وَنباگ !
ألِمّك ماي والعاذِل يبَدّيك
....
تعال وشوف دمعي بيوم الإوداع
مِثِل حَز الخناجر فوگ الإخدود
ماي آني إوتِبَدّه إوحضنِتَه الگاع
ويادمعه التِرِد لعيونها إردود
گِلّي إويا ثَلِج بالنار ما ماع
هـيچ إني چِنِت بجفاك مَمرود
ياحِزنَك عَلَيْ من فارَگِت لاگ
وگِلت هيهات بَعْد الصار أوافيك
لَچن گلبي يرِف وَتشَبّگ إشباگ
وگوم أرجِف حبيبي من ألاگيك
....
تعال إومُر على اليهواك خطّار
تِلگه إجروحنه الملحك معازيب
گِصه ويانه الوَكِت وچفوفنه إگصار
وَلا مَرّيت بينه إوتِذكُر الطيب
الذهب يرجع ذهب لو حِرگِته النار
إو تِصير إوذان وَنّات المصاويب
نِذَرْت إدموع للغايب يَعِشّاگ
گِلِت يرجع وَگِلّه بعيني أخَليّك
وَظُمّك بالگَلُب بِجروحه الإغماگ
وَخاف إمْن النِده عن لا يوَعّيك
....
تعال وياي نگطَع وَحشَةْ الليل
وَضَوّيلَك وصير بليلك إشموع
أمِد روحي جِسِر لو مَرّك السيل
وَعْصُر عيني إلك من تعطش إدموع
وَفَرْفِحلَك وَحُضنك وآخذَك شيل
وَشِگ گلبي وَظُمّك بين الإضلوع
أنه الغَرگان وِنته إمگابُل الراگ
ولا مَدّيت چَفّك لليناديك
وَلا چَنها إعله مودَك ناشفَه إرياگ
ولا چَنّك گِلِت بالشِدّه أجازيك
.....
ناظم الحاشي
رد مع اقتباس
المشاركة الأصلية كتبت بواسطة كبريائي قاهرهم
