اكو كلمات تكولها امهاتنا بنعاويهن تحسها اصدق واطهر اظهار للمشاعر رغم بساطة الكلمات بس تحسهن صادقات وتحس كل كلمة تلامس مشاعرك وتبجيك مثلاً امي تكول
روحي مثل حب الشلب
مسلسة ومابيها لب
جا هلبت اليكره يحب
وتختمها بكلمة يمه مصيفي ( مصطفى ) يابعد كلبي
بهاي الكلمات البسيطة يكدرن يخلنك تبجي ويحركن كل الحنين الي بداخلك عن نفسي انا اعتبره هذا من اجمل انواع الفنون الشعبية العراقية ممكن يكون موجود بغير دول عربية بس يختلف لكن ماممكن احد يسويه مثل العراقيين لان هو بكل بساطة فن حزين ويحتاجله شخص يكون مملوء بالحزن ولا اعتقد اكو شخص حزين بكد العراقي طبعاً لازم نذكر احد اهم الشاعرات الي كتبن هذا النوع من الشعر الي هي الشاعرة فدعة بنت علي الصويح
المشكلة ان هذا النوع من الفن بعد عشرين سنة راح ينقرض لان بناتنا الشابات وشبابنا الله يحفظهم يعتبرونا نوع من انواع التخلف
عن نفسي راح احفظ اكبر عدد منهن واسمعهن لابنائي
المشاركة الأصلية كتبت بواسطة رمـْـْْـْــــــــآڊ
